Jyoti chandekar death : ज्येष्ठ मराठी अभिनेत्री ज्योती चांदेकर यांच्याबाबत मोठी दुःखद बातमी समोर आली आहे. आज दिनांक १६ ऑगस्ट रोजी ज्योती यांचे निधन झाले आहे. वयाच्या ६९व्या वर्षी त्यांनी अखेरचा श्वास घेतला. अभिनेत्रीच्या अचानक आलेल्या निधनाच्या बातमीने सिनेविश्वावर शोककळा पसरली आहे. अद्याप त्यांच्या मृत्यूचे कारण काही समोर आलेले नाही. अखेर आज त्यांची दुपारी ४च्या सुमारास प्राणज्योत मालवली. त्यांच्या पार्थिवावर उद्या सकाळी ११ वाजता पुण्यातील वैकुंठ स्मशानगृहात अंत्यसंस्कार पार पडणार आहेत. त्यांच्या पश्चात दोन मुली आहेत. आतापर्यंत ज्योती यांनी अनेक लोकप्रिय चित्रपट, मालिका, नाटकांमध्ये काम केलं आहे. गेली अनेक वर्ष त्या मराठी चित्रपटसृष्टीत कार्यरत आहेत. ज्योती चांदेकर या तेजस्विनी पंडितच्या आई आहेत.
अभिनयाबरोबरच ज्योती सोशल मीडियावरही बऱ्यापैकी सक्रिय असतात. नेहमीच त्या हटके रील व्हिडीओ करत चाहत्यांच्या संपर्कात राहतात. त्यांची डान्स एनर्जी एखाद्या तरुणाला लाजवेल अशी होती, असं म्हणणं चुकीचं ठरणार नाही. टीआरपीच्या शर्यतीत नेहमीच आघाडीवर असलेल्या स्टार प्रवाह वाहिनीच्या ठरलं तर मग या मालिकेत त्या पूर्णा आजी या भूमिकेत कार्यरत होत्या. पूर्णा आजीचं पात्र ज्येष्ठ अभिनेत्री ज्योती चांदेकर यांनी साकारलं आहे. या मालिकेतील प्रत्येक पात्राने प्रेक्षकांच्या मनात एक वेगळी जागा निर्माण केली आहे. अर्जुन, प्रिया, कल्पना, पूर्णा आजी, अस्मिता अशी मालिकेतील ही सगळीच मंडळी घराघरांत लोकप्रिय आहेत.
ज्योती चांदेकर यांनी आजवर ‘गुरू’, ‘ढोलकी’, ‘तिचा उंबरठा’, ‘पाऊलवाट’, ‘सलाम’, ‘सांजपर्व’ अशा अनेक चित्रपटांमध्ये काम केलं आहे. याशिवाय छोट्या पडद्यावरील ‘तू सौभाग्यवती हो’, ‘छत्रीवाली’ या मालिकांमध्येही त्यांनी महत्त्वाच्या भूमिका साकारल्या आहेत. सध्या ‘स्टार प्रवाह’ वाहिनीवरील ‘ठरलं तर मग’ (Tharala Tar Mag ) या मालिकेद्वारे त्या प्रेक्षकांचं मनोरंजन करत होत्या. अशातच आलेल्या त्यांच्या निधनाच्या बातमीने साऱ्यांना मोठा धक्का बसला आहे.
