मंगळसूत्र हा स्त्रियांच्या आयुष्यातील अविभाज्य घटक आहे, असं म्हणणं चुकीचं ठरणार नाही. प्रत्येक स्त्री लग्नानंतर मंगळसूत्र घालते. पती बरोबरच्या नात्याची मंगळसूत्र ही खूण आहे. आजकाल विविध डिझाइन्सच्या मंगळसूत्रांची क्रेज स्त्रियांमध्ये असलेली पाहायला मिळते. विशेषता या स्त्रिया सोशल मीडियावरील हटके डिझाइन्सला फॉलो करताना दिसतात. इतकंच नव्हे तर मालिका, चित्रपटांमधील कलाकारांच्या मंगळसूत्रांची ही क्रेझ स्त्रीवर्गात पाहायला मिळते. (Spruha Joshi Mangalsutra)
‘होणार सून मी या घरची’ या मालिकेतील जानवीच्या गळ्यातील तीन पदरी मंगळसूत्र हे बरंच चर्चेत राहिलं होतं. आज मालिका संपून अनेक वर्ष झाली असली तरी या मंगळसूत्राची सर्वत्र चर्चा रंगलेली पाहायला मिळते. आणि हे मंगळसूत्र बऱ्याच स्त्रियांनी घातलेलेही पाहायला मिळाले. आता यानंतर आणखी एका मालिकाविश्वातील अभिनेत्रीच्या गळ्यातील मंगळसूत्राची चर्चा रंगलेली पाहायला मिळत आहे. लवकरच कलर्स मराठीवर ‘सुख कळले’ ही मालिका प्रेक्षकांच्या भेटीस येण्यास सज्ज होणार आहे. आणि या मालिकेत प्रेक्षकांची लाडकी अभिनेत्री स्पृहा जोशी झळकणार आहे. मालिकेच्या प्रोमोमध्ये स्पृहाला पाहून तिच्या चाहत्यांना प्रचंड आनंद झाला आहे. स्पृहाचा मालिकाविश्वातील हा कमबॅक प्रेक्षकांना भरपूर आवडलेला दिसत आहे.
मालिकेचा प्रोमो पाहून प्रेक्षकांनी स्पृहाच्या मंगळसूत्राची चर्चा केलेली पाहायला मिळतेय. स्पृहाच्या गळ्यातील हटके मंगळसूत्राच्या डिझाईन लक्ष वेधून घेतले आहे. प्रोमोमध्ये स्पृहाच्या गळ्यात एक हटके मंगळसूत्र पाहायला मिळतंय जे अतिशय वेगळं आहे. या मंगळसूत्राची डिझाइन अतिशय खास आहे. मंगळसूत्रात चैन असून त्यात काळे मणी आणि शेवटी एक पेंडेंट आहे. या पेंडेंटच्या डिझाइनने सगळ्यांना चकीत केलं आहे. या पेंडंटमध्ये दोन पावलं आहेत. तर या पावलांच्या बोटांच्या जागी हिरे बसवण्यात आले आहेत. आता हे आगळंवेगळं मंगळसूत्र प्रेक्षकांच्या पसंतीस उतरलं आहे.
या मालिकेत स्पृहासह अभिनेता सागर देशमुख मुख्य भूमिकेत झळकणार आहे. याशिवाय स्पृहा व सागरबरोबर मिमी खडसे ही बालकलाकार देखील पाहायला मिळणार आहे. आता पुन्हा एकदा सागर व स्पृहा एका नव्या मालिकेतून प्रेक्षकांच्या भेटीला येणार आहेत, ही मालिका केव्हा पाहायला मिळणार हे अद्याप गुलदस्त्यात ठेवण्यात आलं आहे.