Tharala Tar Mag : ‘ठरलं तर मग’ मालिका गेल्या अनेक वर्षांपासून रसिक प्रेक्षकांच्या मनात घर केलं आहे. टीआरपीच्या शर्यतीत या मालिकेने अव्वल स्थान निर्माण केलं आहे. ही मालिका सुरु झाली तेव्हापासून या मालिकेतील कलाकारांनी रसिकांचं मन जिंकलं. मालिकेतील सगळेच कलाकार मालिकेला एका उंचीवर घेऊन जाण्यासाठी कारणीभूत आहेत. मात्र काही दिवसांपूर्वी मालिकेतील अत्यंत महत्त्वाचं आणि सगळ्यांच्या जवळच्या पात्रामध्ये म्हणजेच पूर्णा आजीच्या भूमिकेत असलेल्या अभिनेत्री ज्योती चांदेकर यांचं निधन झालं. यांच्या निधनाच्या बातमीने सिनेसृष्टीवर शोककळा पसरली. मालिकेतील त्यांचे पात्र अर्ध्यावरच सोडून त्या निघून गेल्या, अर्थात हे दुःख पचवणं कठीण आहे.
ज्योती चांदेकर यांच्या निधनानंतर पूर्णा आजी हे पात्र मालिकेत कोण साकारणार याकडे साऱ्यांच्या नजरा लागू राहिल्या होत्या. मात्र काही चाहत्यांच्या मते या भूमिकेत कोणीही नको असं मत समोर आलं. तर काहींनी अनेक ज्येष्ठ अभिनेत्रींची नावे घेतली. अखेर पूर्णा आजीची भूमिका कोण साकारणार या प्रश्नाला आता स्टार प्रवाह वाहिनीने पूर्णविराम दिला आहे.
आणखी वाचा – Video : कुटुंबाचं पत्र पाहून प्रणित मोरे ढसाढसा रडला आणि…; इतर स्पर्धकांच्याही डोळ्यांत पाणी
नुकत्याच समोर आलेल्या प्रोमोमध्ये, मालिकेत पूर्णा आजीची एंट्री झाल्याचं पाहायला मिळत आहे. ही भूमिका नेमकं कोण साकारतंय हे अद्याप समोर आलेलं नाही. मात्र पाठमोऱ्या पूर्णा आजीच्या भूमिकेत समोर आलेल्या व्हिडीओने ही उत्सुकता अधिकच वाढली आहे. “अन्नपूर्णा निवासात पुन्हा एकदा आनंद घेऊन येणार पूर्णाआजी” असं कॅप्शन देत हा व्हिडीओ समोर आला आहे. सदर प्रोमोवर आलेल्या कमेंटने मात्र अनेकांच्या नजरा वळविल्या आहेत.
“होणार सून मी या घरची मधली आई आजी”, “रोहिणी हट्टंगडी”, “रोहिणी ताई हट्टंगडी”, “खूप इमोशनल, अंगावर काटा आला असं वाटलं जुनी पूर्णा आजी आली”, “येस रोहिणी हट्टंगडी”, अशा अनेक कमेंट या व्हिडीओवर आल्या आहेत. अर्थात व्हिडीओवर आलेल्या कमेंटवरुन पूर्णा आजी ही भूमिका रोहिणी हट्टंगडी साकारणार असल्याचं प्रेक्षकांचं म्हणणं आहे. आता नक्की मालिकेत ही भूमिका कोण साकारणार हे लवकरच समोर येईल.
