बॉक्स ऑफिसवर सध्या मराठी चित्रपटांनी धुमाकूळ घातलेला पाहायला मिळत आहे. अशातच सध्या नाच गं घुमा या चित्रपटाची चर्चा सुरु असलेली पाहायला मिळत आहे. अल्पावधीतच या चित्रपटाने बॉक्स ऑफिसवर बक्कळ कमाई केलेली पाहायला मिळत आहे. प्रेक्षकही या चित्रपटाला भरभरुन प्रतिसाद देताना दिसत आहेत. बॉक्स ऑफिसवर बरेच रेकॉर्ड मोडत या चित्रपटाने जबरदस्त कमाई केली. परेश मोकाशी दिग्दर्शित ‘नाच गं घुमा’ हा चित्रपट १ मे रोजी प्रदर्शित झाला. या चित्रपटात अभिनेत्री मुक्ता बर्वे, नम्रता संभेराव, मायरा वायकुळ, सारंग साठे प्रमुख भूमिकेत पाहायला मिळत आहेत. (Nach Ga Ghuma Team Video)
सध्या या चित्रपटाचं जोरदार प्रमोशन सुरु असलेलंही पाहायला मिळत आहे. चित्रपटातील कलाकार मंडळी चित्रपटाच्या प्रमोशनमध्ये व्यस्त आहेत. मात्र या प्रमोशनदरम्यान चित्रपटातील मुख्य अभिनेत्री मुक्ता बर्वे दिसली नाही. कारण मुक्ता तिच्या कामानिमित्त अमेरिका येथे गेली होती. आता मुक्ता अमेरिकेतून परतली असून तिच्या स्वागतासाठी ‘नाच गं घुमा’ची टीम एअरपोर्टवर पोहोचली आहे.
“राणीताई महिनाभर अमेरिकेला होत्या, कामासाठी त्या तिकडे गेल्या होत्या. आज त्या परत येणार आहेत, आणि आम्ही त्यांना इथे घ्यायला आलो आहोत. त्यांना माहित नाही आहे. सरप्राइज की काय ते असतं ते आम्ही त्यांना देणार आहोत”, असं नम्रता संभेराव म्हणजेच चित्रपटातील आशाताई बोलताना दिसत आहे. यावर मुक्ता बोलतेय, “खूप मस्त. मी वेडी झाले. मी हे सगळं मिस करत आहे. आणि प्रमोशन सुरु आहे, सिनेमा हिट होत आहे आणि मी इथे नाही आहे. या दोघी आता समोर आल्या त्यांना पाहून खूप मस्त वाटलं”, असं बोलत मुक्ता थोडीशी भावुकही झालेली पाहायला मिळाली.
एअरपोर्टवरचा हा व्हिडीओ ‘नाच गं घुमा’च्या इन्स्टाग्राम अकाउंटवरुन पोस्ट केला असून त्याखाली कॅप्शन देत “आमची राणी गेला एक महिना भारताबाहेर होती. प्रमोशनदरम्यान आशाताईंनी आणि आम्ही सर्वांनीच तिला खूप मिस केलं. म्हणूनच ‘नाच गं घुमा’ टीम जाऊन पोहोचली एअरपोर्टवर राणीला म्हणजेच आपल्या लाडक्या मुक्ता बर्वेला सरप्राइज द्यायला. आमचं बॉण्डिंग, आमची मज्जा चित्रपटात नक्की बघा”, असं म्हटलं आहे.