ज्येष्ठ बॉलिवूड अभिनेते धर्मेंद्र व ड्रीम गर्ल हेमा मालिनी यांची मुलगी तिच्या अभिनय कारकिर्दीपेक्षा तिच्या वैयक्तिक आयुष्यामुळे अधिक चर्चेत राहिली आहे. अलीकडेच ईशा देओलबाबत समोर आलेल्या एका बातमीने सर्वांनाचं आश्चर्य वाटले आहे. गेले काही दिवस अभिनेत्री पती भरत तख्तानीपासून विभक्त झाली असल्याच्या चर्चा सोशल मीडियावर रंगताना पाहायला मिळाल्या होत्या. अशातच आता दोघांनी त्यांच्या नात्यात दुरावा आल्याचं अधिकृतपणे सांगितलं आहे.
ईशा देओल व भरत तख्तानी लग्नाच्या १२ वर्षानंतर वेगळे होत आहेत. दोघांनी परस्पर संमतीने वेगळे होण्याचा हा निर्णय घेतला आहे. दोघांनी मिळून एक प्रतिक्रिया दिली आहे, ज्यात त्यांनी असं म्हटले आहे की, “आम्ही दोघांनी परस्पर संमतीने वेगळे होण्याचा निर्णय घेतला आहे. आमच्या जीवनातील या बदलामुळे आमच्या दोन मुलांचे हित आणि कल्याण आमच्यासाठी अत्यंत महत्त्वाचे आहे आणि यापुढेही ते कायम राहील. यादरम्यान आमच्या गोपनीयतेचा आदर केला जाईल अशी आशा बाळगतो.”
ईशा देओलच्या यंदाच्या वाढदिवसाच्या सेलिब्रेशनमध्ये भरत हा कुठेच दिसला नाही. याशिवाय एका सोशल मीडिया यूजरने १७ जानेवारीला Reddit वर एक पोस्ट शेअर केली आणि त्यात असे सांगितले होते की, “ईशा आणि भरत आधीच एकमेकांपासून वेगळे झाले आहेत. त्यामुळे ते आता सार्वजनिक ठिकाणी एकत्र दिसत नाहीत.”
दरम्यान, ईशा देओलने जून २०१२ मध्ये भरतशी लग्न केले होते. मुंबईच्या इस्कॉन मंदिरात अत्यंत साधेपणाने त्यांचा विवाह पार पडला होता. लग्नाच्या पाच वर्षानंतर, हे जोडपे एका मुलीचे आई-वडील झाले आणि त्यानंतर २०१९ मध्ये ईशाने त्यांची दुसरी मुलगी मिराया तख्तानीला जन्म दिला.