दाक्षिणात्य अभिनेत्री अरुंधती नायरच्या अपघाताच्या बातमीने साऱ्यांना आश्चर्याचा धक्का बसला. या अपघातादरम्यान अभिनेत्रीला गंभीर दुखापत झाली. सध्या अभिनेत्रीची प्रकृती चिंताजनक आहे. तमिळ व मल्याळम चित्रपटांमध्ये काम केलेल्या अरुंधती नायरचा १४ मार्च रोजी भीषण अपघात झाला. त्यानंतर तिला तातडीने रुग्णालयात दाखल करण्यात आले होते. अभिनेत्री गेल्या ६ दिवसांपासून रुग्णालयात असून मृत्यूशी लढा देत आहे. यादरम्यान अभिनेत्रीला शस्त्रक्रियाही कराव्या लागणार आहेत, त्यासाठी तिची मैत्रिण गोपिका अनिल हिने आर्थिक मदतीचा हात पुढे केला आहे. कुटुंबाने निधी उभारणी मोहिमेद्वारे लोकांकडून पैसेही मागितले आहेत. (Arundhati Nair Accident)
गोपिका अनिलने सोशल मीडियावर एक पोस्ट शेअर केली आहे, ज्यामध्ये तिने तिची मैत्रिणी अरुंधती नायरसाठी आर्थिक मदतीची हाक दिली आहे. चाहत्यांना व फॉलोअर्सला मदतीसाठीचे आवाहन केले आहे. गोपिका अनिलने तिच्या इंस्टाग्राम स्टोरीवर बँक खात्याचे तपशील देखील शेअर केले ज्यामध्ये पैसे जमा करता येऊ शकतील. गोपिका अनिलने इंस्टाग्राम स्टोरीवर लिहिले आहे की, “माझी मैत्रिण अरुंधती नायरची प्रकृती अजूनही नाजूक आहे. काही दिवसांपूर्वी तिचा अपघात झाला होता. ती अजूनही व्हेंटिलेटरवर आहे आणि दररोज हॉस्पिटलचे बिल वाढत आहे, जे तिच्या कुटुंबाला परवडणे कठीण झाले आहे. आम्ही आमच्या बाजूने योगदान देत आहोत, परंतु रुग्णालयाचे बिल खूप जास्त असल्याने ते पुरेसे नाही. माझी तुम्हा सर्वांना विनंती आहे की, अरुंधती आणि तिच्या कुटुंबियांना मदत करता यावी यासाठी तुम्ही जमेल त्या मार्गाने पैसे द्या. ती लवकर बरी व्हावी यासाठी आपण सर्व मिळून प्रार्थना करुया”, असं कॅप्शन देत तिने मदतीची हाक दिली आहे.
अरुंधती नायरची आणखी एक मैत्रीण रेम्या जोसेफ म्हणाली की, “अभिनेत्रीला तिच्या उपचारासाठी आर्थिक मदतीची गरज आहे. पण तमिळ चित्रपटसृष्टीतील कोणीही अभिनेत्रीच्या मदतीसाठी पुढे आले नाही”, असंही सांगितलं. याबाबत रेम्या जोसेफने पीटीआयला सांगितले की, “अरुंधतीने तामिळमध्ये मुख्य नायिका म्हणून पाच चित्रपट केले आहेत”.
अरुंधतीसाठी आर्थिक मदतीची मागणी करताच अनेकांनी अभिनेत्रीच्या कुटुंबियांना व मित्रपरिवाराला ट्रोल करायला सुरुवात केली आहे. या ट्रोलर्सला उत्तर देत अरुंधतीची बहीण आरती नायरने ‘पीटीआय’ला दिलेल्या मुलाखतीत असं म्हटलं की, “माझी बहीण गंभीर जखमी झाली आहे. आणि काही दिवसांपासून तिच्याकडे विशेष लक्ष दिले जात आहे. आर्थिक मदतीची विनंती करताच काहींनी हा घोटाळा आहे, असं म्हणत ट्रोल करायला सुरुवात केली आहे. आम्ही हॉस्पिटलमध्ये धावपळ करत असताना आम्हाला अशा नकारात्मकतेला सामोरे जावे लागले”.