marathi Actor Tushar Ghadigaonkar suicide : काम मिळत नसल्याने आत्महत्या हा काही पर्याय नाही. हो. असं बोलण्यामागचं कारण म्हणजे नुकतीच मराठी सिनेविश्वातून आलेली दुःखद बातमी. अभिनेता, दिग्दर्शक आणि लेखक तुषार घाडीगांवकरचे निधन झाले असल्याची धक्कादायक बातमी समोर आली आहे. यादरम्यान, तुषारने आत्महत्या केली असल्याचं समोर आलं आहे. तुषारच्या निधनाच्या बातमीने सिनेसृष्टीत खळबळ माजली आहे. तुषारच्या आत्महत्येची बातमी समोर येताच चाहत्यांना आणि कलाकारांनाही धक्का बसला. तुषारच्या निधनाची बातमी अभिनेता अंकुर वाढवेने इंस्टाग्राम पोस्टद्वारे दिली.
‘आत्महत्या हा पर्याय नाही’, असं म्हणत अंकुरने तुषारचा मालिकेतील सीनदरम्यानचा फोटो शेअर करत निधनाची बातमी दिली आहे. तुषारच्या या निर्णयाने साऱ्यांनाच धक्का बसला आहे. आजवर त्याने अनेक मालिका आणि चित्रपटांमध्ये महत्त्वपूर्ण कामगिरी केली. मात्र, त्याने आत्महत्येसारखा चुकीचा निर्णय का घेतला हा प्रश्न आजही सतावत आहे. मूळचा कणकवलीचा असलेल्या तुषारने नाटकांमधून अभिनयाची सुरुवात केली.
आणखी वाचा – मालिकाविश्वातील लोकप्रिय चेहरा अडकला लग्नबंधनात, बालपणीच्या मैत्रिणीसह थाटला संसार, फोटो समोर
अंकुरने तुषारच्या निधनाची पोस्ट शेअर करत असं म्हटलं की, “मित्रा का? कशासाठी? आपण मार्ग काढले पाहिजे पण आत्महत्या हा मार्ग नाही. मान्य आहे सध्याची परिस्थिती विचित्र आहे पण हा निर्णय असू शकत नाही. तुषार घाडीगांवकर तू हरलास म्हणजे आम्ही सगळे हरलो”. अंकुरची ही भावुक पोस्ट सध्या तुफान व्हायरल झाली असून अनेक कलाकार आणि चाहतेही त्याच्या या पोस्टवर कमेंट करत भावुक झालेले दिसत आहेत.
आणखी वाचा – काजोलचा देवावरील विश्वासच उडाला, ‘तो’ काळ अभिनेत्रीसाठी खूपच कठीण, म्हणाली, “हे सोपे नव्हते”
तुषारच्या निधनाच्या बातमीवर सिनेविश्वातील कलाकार मंडळी त्याला श्रद्धांजली वाहत आहेत. लवंगी मिरची, मन कस्तुरी रे, उनाड, हे मन बावरे, भाऊबळी या कलाकृतींमधून तुषारने प्रेक्षकांच्या मनावर राज्य केलं. नाटकांमधून अभिनयाची सुरुवात करणारा तुषार कालांतराने मालिका आणि नाटकविश्वातही रमला.
