Priya Marathe cancer death : कलाविश्वातील सुप्रसिद्ध अभिनेत्री प्रिया मराठे हिचं वयाच्या अवघ्या ३८ व्या वर्षी निधन झाले. अचानक निधन झाल्याच्या बातमीने संपूर्ण कलाविश्वाला मोठा धक्का बसला होता. प्रिया कित्येक वर्ष कर्करोगाशी झुंज देत होती. यावेळी तिचा पती अभिनेता शंतनू मोघे याने तिची साथ दिली. प्रियाच्या निधनानंतर अभिनेता शंतनू मोघेने प्रियासाठी एक खास पोस्ट शेअर केली आहे. ज्यामध्ये त्यांनी भावना व्यक्त करत म्हटलं, “ही एक अतिशय खास कृतज्ञता पोस्ट आहे”. यापूर्वी शंतनूने प्रियाच्या निधनाबाबत कोणतीही पोस्ट शेअर केली नव्हती. अखेर तिच्या निधनाला महिना होताच या पोस्टद्वारे शंतनू व्यक्त झाले आहेत.
त्यांनी इंस्टाग्रामवर प्रियाबरोबरचे फोटो शेअर करत असं म्हटलं की, “फोन कॉल्स, ई-मेल्स, व्हॉट्सअॅप, एक्स (ट्विटर), इंस्टाग्राम, फेसबुक अशा सगळ्या वेगवेगळ्या माध्यमांमधून आपल्या मनातील प्रेम, आपुलकी, शुभेच्छा आणि आशीर्वाद आमच्यापर्यंत पोहोचवणाऱ्या प्रत्येकाचं मनापासून आभार. कुटुंबीय, मित्रमैत्रिणी, चाहते, फॉलोअर्स, परिचित किंवा अगदी अनोळखी लोकसुद्धा सगळ्यांनी इतक्या मनापासून भावना व्यक्त केल्या. तुमचं ऊबदार प्रेम, खरं-खरं जाणवणारं दुःख आणि खरी काळजी ही कुठल्याही शंकेशिवाय आमच्यापर्यंत पोहोचली.
आणखी वाचा – अखेर जयंतच सत्य समोर, जान्हवी घेणार मोठा निर्णय; तर सिद्धू होणार किडनॅप, मोठा ट्विस्ट
देशभरातून, जगभरातून मिळालेले आशीर्वाद आणि शुभेच्छा यांनी पुन्हा एकदा मानवतेवरचा आमचा विश्वास अधिक दृढ केला. देवा सगळ्यांना सुखी ठेव. आज प्रियाला जाऊन एक महिना पूर्ण झाला. आमचं वैयक्तिक दुःख आणि वेदना शब्दांत मांडणं खरंच अशक्य आहे. इतक्या लवकर, अन्यायकारक, अनपेक्षित आणि नको असलेल्या या निरोपामुळे मन आतून पोखरून गेलं आहे. पण तिनं आपल्या कामातून, कलेतून, प्रेमातून, काळजीतून, दयाळूपणातून, वागण्या-चालण्यातून, संवेदनशीलतेतून आणि सर्वात महत्त्वाचं म्हणजे कृतीतून व तिच्या सुंदर “वाइब्स”मधून हजारो-लाखो हृदयांना स्पर्श करुन ठेवलं आहे.
आज पुन्हा एकदा मनापासून आभार प्रत्येकाचे… नेहमीच आमच्या सोबत उभे राहिल्याबद्दल, दुःखात-सुखात हात दिल्याबद्दल. तुमच्यावर खूप प्रेम, खूप शुभेच्छा. मनःपूर्वक आभार. देवा, एक चूकही नको आता… तिची नीट काळजी घ्यावी, तिला प्रेम द्यावं – अन्यथा आम्ही माफ करणार नाही. ती माझी देवदूत आहे… पुन्हा भेटू तोपर्यंत”, अशा शब्दात त्याने भावना व्यक्त केल्या आहेत. शंतनूच्या या पोस्टवर लाईक्सचा वर्षाव झालेला पाहायला मिळाला आहे.
