मराठीसह हिंदी मनोरंजनविश्वात आपल्या अभिनयाने प्रेक्षकांना भुरळ घालणारी जोडी म्हणजे दिवंगत अभिनेते रमेश देव व अभिनेत्री सीमा देव. या जोडीने आतापर्यंत अनेक चित्रपट व नाटकांत काम करत प्रेक्षकांचे मनोरंजन केले आहे. गेले अनेक दशक या जोडीने प्रेक्षकांच्या मनावर राज्य केले आहे. रमेश देव व सीमा देव यांना अभिनय व अजिंक्य दोन अपत्य आहे. त्यापैकी अजिंक्य देव हे ‘माहेरची साडी’ या लोकप्रिय चित्रपटातून नावारूपास आले. तेव्हापासून सुरू झालेला त्यांचा प्रवास अजून पर्यंतही चालूच आहे. दरम्यान ‘इट्स मज्जा’ला दिलेल्या एका मुलाखतीत त्यांनी वडील रमेश देव यांची कामाप्रती असलेली निष्ठा व प्रेम याबद्दल सांगितले. (Ajinkya Deo Talk About His Father Ramesh Deo)
यावेळी मुलाखतीत अजिंक्य देव यांनी बाबांबद्दलचा एक किस्साही सांगितला. यावेळी ते असं म्हणाले की, “मी सायन्समध्ये पदवीधर झालो होतो. प्रॉडक्शन हाऊस बाबांनी सुरु केलं होतं. पण मी हाडामासाचा कलाकार नाही. माझे बाबा चित्रपटसृष्टीमध्ये काम करणारे हाडामासाचे कलाकार होते. २०२२ मध्ये त्यांचं निधन झालं. २ फेब्रुवारीला ते गेले. निधनापूर्वी आठ दिवस आधी त्यांना चालतही येत नव्हतं. त्यांच्या पायांचं ऑपरेशन झालं होतं. त्यांची तब्येतही ठिक नसायची. मी घरी आलो तेव्हा मला कळालं की, बाबा बाहेर गेले आहेत. ते कुठे गेले आहेत हे कोणालाच माहित नव्हतं. रात्री १०-११ च्या दरम्यान घरी आले. तेव्हा कळलं की, ते कुठल्यातरी मालिकेचं चित्रीकरण करुन घरी आले आहेत. वयाच्या ९३व्या वर्षी त्यांनी हे सगळं केलं. निधनाच्या १५ दिवसांपूर्वी हे सगळं घडत होतं. ते खरे कलाकार होते. मी अपघाताने कलाकार झालो. मी शिक्षणासाठी अमेरिकेमध्ये गेलो होतो. पण ते सगळं सोडून मी परत आलो होतो.”
याचबरोबर त्यांनी आई-वडिलांबरोबर घालवलेल्या खास क्षणांबद्दलही सांगितले. आईविषयी बोलताना ते म्हणाले की, “आई-बाबांबरोबरचे सगळेच प्रसंग खूप छान होते. मात्र कालांतराने आईला ‘अल्झायमर’ हा आजार झाला. ज्या बाईने आमच्यावर, तिच्या चाहत्यांवर आणि सगळ्यांवरच प्रेम केलं. तिला विस्मृती का व्हावी हा प्रश्न मला कायम पडतो. शेवटच्या दोन अडीच वर्षात तिच्याबरोबर घालवलेला वेळ मी कधीच विसरू शकत नाही. तेव्हा असं वाटलं की, आम्ही बरंच काही करू शकलो असतो, पण आम्ही केलं नाही, ही आमची चूकचं झाली. आणि हे आमच्यासाठी फार दुःखद होतं” असं म्हणत आईवडीलांच्या आठवणीत ते थोडे भावुकही झाले.
दरम्यान, अजिंक्य देव यांनी आतापर्यंत मालिका, चित्रपट माध्यमांत काम करत प्रेक्षकांचे मनोरंजन केले आहे. त्याचबरोबर आगामी काळातही त्यांचे अनेक चित्रपट प्रेक्षकांच्या भेटीला येणार असल्याचे त्यांनी या मुलाखतीत सांगितले. त्यामुळे त्यांच्या आगामी चित्रपटांसाठी प्रेक्षक आतुर आहेत.