Rashid Khan passed away : संगीत विश्वातून नुकतीच एक दु:खद बातमी समोर येत आहे. शास्त्रीय संगीत क्षेत्रातील दिग्गज गायकांपैकी एक उस्ताद रशिद खान यांचे निधन झाले आहे. ते ५५ वर्षाचे होते. गेले काही दिवस त्यांच्यावर व्हेंटिलेटरवर उपचार घेत होते. मात्र अखेर त्यांची ही झुंज अपयशी ठरली आहे. राशिद खान यांच्या निधनाबद्दल बोलताना रुग्णालयाच्या अधिकऱ्याने असे म्हटले की, “आम्ही सर्वतोपरी प्रयत्न केले. पण आमचे प्रयत्न अपुरे पडले. आज दुपारी ३.४५च्या सुमारास राशिद यांचे निधन झाले आहे.”
बंगालच्या मुख्यमंत्री यांनी आपले दु:ख व्यक्त करत असे म्हटले आहे की, “संपूर्ण देशासाठी आणि संपूर्ण संगीत समुदायासाठी हे एक मोठे नुकसान आहे. राशिद खान यांच्या निधनाच्या बातमीने मला खूप दु:ख झाले आहे. मला अजूनही विश्वास बसत नाही की राशिद खान आता आपल्यात नाहीत.”
राशिद खान हे रामपूर-सहस्वान घराण्यातील खान हे घराण्याचे संस्थापक इनायत हुसेन खान यांचे पणतू आहेत. त्यांनी वयाच्या अवघ्या ११ वर्षी आपल्या संगीत कारकिर्दीला सुरुवात केली होती. राशिद खान हे प्रामुख्याने शास्त्रीय गायक म्हणून प्रसिद्ध असले तरी, त्यांच्या फ्यूजन आणि चित्रपट गाण्यांना देखील भरपूर लोकप्रियता मिळाली आहे. त्यांनी ‘माय नेम इज खान’, ‘राझ ३, ‘बापी बारी जा’, ‘कादंबरी’, ‘शादी में जरूर आना’, ‘मंटो’ आणि ‘मीटीन मास’ यांसारख्या चित्रपटांसाठीही त्यांनी गाणी गायली आहेत.
दरम्यान, राशिद खान यांच्या निधनाने संगीत विश्वात एक वेगळीच पोकळी निर्माण झाली आहे. त्यांच्या निधनावर अनेकांनी शोक व्यक्त केला आहे. तसेच राशिद खान यांच्या जाण्याने अनेकांना दु:ख झाले असून सोशल मीडियाद्वारे त्यांनी राशिद खान यांना श्रद्धांजली वाहिली आहे.
