‘शाळा’ हा प्रत्येकाच्याच आयुष्यातला एक अविभाज्य घटक असतो. शाळा म्हटली तर प्रत्येकाच्या शाळेच्या आठवणीही आल्याच. त्यात दहावीचे वर्ष कायमच सर्वांसाठी खास असते. शाळेत घालवलेल्या प्रत्येक खास व संस्मरणीय आठवणींची शिदोरी घेऊन प्रत्येकजण आपल्या नव्या आयुष्याला सुरुवात करतो. अशीच शालेचं आणि शाळेतील आठवणींचं भावविश्व उलगडून दाखवणारी ‘मीडिया वन सोल्युशन्स’ प्रस्तुत, ‘कोरी पाटी’ प्रॉडक्शन व ‘इट्स मज्जा’ ओरिजिनल एक सीरिज घेऊन प्रेक्षकांच्या भेटीला आले आहेत आणि या सीरिजचं नाव आहे ‘दहावी-अ’. ‘आठवी-अ’च्या भरघोस यशानंतर ‘इट्स मज्जा’ प्रेक्षकांसाठी ‘दहावी-अ’ ही सीरिज घेऊन प्रेक्षकांच्या भेटीला आलं आहे. (Dahavi-A Series Trailer)
‘इट्स मज्जा’ने आपल्या प्रेक्षकांच्या मनोरंजनासाठी काही दिवसांपूर्वी ‘आठवी-अ’ ही सीरिज भेटीला आणली होती. या सीरिजला प्रेक्षकांकडून तुफान प्रतिसाद मिळाला होता. डोंगरावरच्या एका छोट्याश्या खेडेगावातून हायस्कुलसाठी परगावी येणाऱ्या आभ्या व त्यांच्या खास मित्रांची साधी तरी प्रत्येकाला आपलीशी व हवीहवीशी वाटणारी गोष्ट प्रेक्षकांनाही तितकीच भावली होती. पण २५ भागांनंतर या सीरिजने प्रेक्षकांचा निरोप घेतला. ‘आठवी-अ’ ही सीरिज संपल्यामुळे चाहत्यांमध्ये नाराजीचा सुर पाहायला मिळाला.
आणखी वाचा – ‘आई कुठे…’ फेम अभिनेत्रीचा फिल्मी स्टाईल संगीत सोहळा, जबरदस्त डान्स, धमाल अन्…; Photo viral
‘आठवी-अ’ या सीरिजच्या निरोपाबरोबरच ‘इट्स मज्जा’ने ‘दहावी-अ’ या सीरिजची घोषणा केली होती. तेव्हापासून अनेकांना ही सीरिज कधी सुरु होणार? याची उत्सुकता लागून राहिली होती आणि आता त्यांची ही उत्सुकता अखेर संपणार आहे. नुकताच ‘इट्स मज्जा’च्या ‘दहावी-अ’ या आगामी सीरिजचा ट्रेलर प्रेक्षकांच्या भेटीला आला आहे. आज २६ डिसेंबर रोजी शाहू कला मंदिर, सातारा येथे ‘दहावी-अ’चा भव्य ट्रेलर लाँच सोहळा पार पडला. ‘इट्स मज्जा’चे शौरीन दत्ता, अंकिता लोखंडे, सीरिज दिग्दर्शक व मुख्य कलाकारांच्या उपस्थितीत हा खास सोहळा पार पडला.
‘दहावी-अ’ मध्येही ‘आठवी-अ’मधील अथर्व अधाटे, सृष्टी दणाने, ओम पाणस्कर, श्रेयश कटके, सत्यजित होमकर, रुद्र इनामदार व संयोगिता चौधरी हे कलाकार आहेत. तसंच काही इतर कलाकारही असणार आहेत. दरम्यान, ‘दहावी-अ’साठी प्रसिद्ध फुड ब्रँड पालेकर व द परफ्युम हाऊस यांचे सहकार्य लाभले आहे. येत्या ६ जानेवारी पासून सोमवारी व गुरुवारी दुपारी १.३० वाजता ‘इट्स मज्जा’च्या युट्यूब चॅनेलवर प्रेक्षकांना पाहता येणार आहे.
