‘इट्स मज्जा’च्या ‘आठवी-अ’ या सीरिजला प्रेक्षकांकडून चांगलाच प्रतिसाद मिळाला होता. डोंगरावरच्या एका छोट्याश्या खेडेगावातून हायस्कुलसाठी परगावी येणाऱ्या आभ्या व त्यांच्या खास मित्रांची साधी तरी प्रत्येकाला आपलीशी वाटणारी गोष्ट या सीरिजद्वारे दाखवण्यात आली होती. या सीरिजने गेले अनेक दिवस प्रेक्षकांचे चांगलेच लक्ष वेधून घेतले होते. त्यामुळे या सीरजमध्ये येणाऱ्या अनेक ट्विस्ट्स व रंजक वळणांमुळे या सीरिजच्या प्रत्येक भागासाठी प्रेक्षक आतुर असायचे. पण अखेर २५ भागांनंतर या सीरिजने प्रेक्षकांचा निरोप घेतला. (Dahavi-A Series Shooting Starts)
‘आठवी-अ’ ही सीरिज संपल्यामुळे अनेक चाहत्यांमध्ये नाराजीचा सुर पाहायला मिळाला. अनेकांनी ‘आठवी-अ’ ही सीरिज संपल्यामुळे दु:ख व्यक्त केलं होतं. ही सीरिज कधीच संपू नये अशा प्रतिक्रियादेखील त्यांनी व्यक्त व्यक्त केल्या होत्या. मात्र प्रत्येक गोष्टीला अंत हा असतोच. त्यामुळे या सीरिजने काही दिवसांपूर्वी सर्वांचा निरोप घेतला आहे. मात्र या सीरिजच्या निरोपाबरोबरच ‘इट्स मज्जा’ने ‘दहावी-अ’ या सीरिजची घोषणा केली होती. तेव्हापासून अनेकांना ही सीरिज कधी सुरु होणार याची उत्सुकता लागून राहिली होती.
अशातच आता सर्वांसाठी एक खुशखबर आहे ती म्हणजे ‘दहावी-अ’च्या शूटिंगचा मुहूर्त नुकताच पार पडला आहे. ‘दहावी-अ’ या बहूप्रतिक्षित सीरिजचा मुहूर्त सोहळा संपन्न झाला असून या सीरिजच्या शूटिंगला सुरुवात झाली आहे. श्रीगणरायाला वंदन करुन ‘इट्स मज्जा’चे प्रमुख शौरीन दत्ता यांनी मुहूर्ताचा नारळ फोडला आणि ‘दहावी-अ’च्या शूटिंगला सुरवात झाल्याची अधिकृत घोषणा केली. या मुहूर्ताचे खास क्षण सोशल मीडियावर नुकतेच शेअर करण्यात आले आहेत. सोशल मीडियाद्वारे अनेक प्रेक्षकांनी ‘इट्स मज्जा’च्या आगामी ‘दहावी-अ’साठी उत्सुकता व्यक्त केली आहे.
दरम्यान, ‘आठवी-अ’च्या भरघोस यशानंतर आता ‘इट्स मज्जा’ आणि ‘मीडिया वन सोल्यूशन्स’ ‘दहावी-अ’ ही वेबसीरिज घेऊन प्रेक्षकांच्या भेटीला येणार आहे. त्यामुळे आता या आगामी सीरिजमध्ये प्रेक्षकांना काय नवीन पाहायला मिळणार? या सीरिजमधून आता आणखी कोणती नवीन कथा दिसणार? ही नवीन सीरिज कधी प्रदर्शित होणार? या आणि अशा अनेक प्रश्नांची उत्तरे प्रेक्षकांना लवकरच मिळणार आहेत.
.
