छोट्या पडद्यापासून अभिनयाची सुरुवात करणारा अभिनेता करण सिंग ग्रोव्हर आज बॉलिवूडच्या सुपरहिट चित्रपटांमध्येही महत्त्वपूर्ण भूमिका साकारताना दिसतो. यावर्षी प्रदर्शित झालेल्या हृतिक रोशन व दीपिका पदुकोणच्या ‘फायटर’ या चित्रपटातही तो दिसला होता. करणने या चित्रपटात सरताज गिलची भूमिका साकारली होती, जी प्रेक्षकांना खूप आवडली होती. करणच्या या भूमिकेचं बरंच कौतुकही झालं. करण सिंग ग्रोव्हर त्याच्या कामासह वैयक्तिक आयुष्यामुळे चर्चेत असतो. अशातच अभिनेत्याने दोन्ही घटस्फोटांवर पहिल्यांदाच प्रतिक्रिया दिली असल्याचं पाहायला मिळत आहे. (Karan Singh Grover personal life)
करण सिंग ग्रोवरने २०१६ मध्ये बिपाशा बासूसह लग्न केले. सध्या करण बिपाशाबरोबर सुखी वैवाहिक जीवन जगत आहे. पण बिपाशापूर्वी करणने अभिनेत्री श्रद्धा निगम आणि जेनिफर विंगेटबरोबरही लग्न केले होते. पण त्यांचे लग्न फार काळ टिकले नाही. करणने त्याच्या भूतकाळाबद्दल कधीही खुलासा केला नव्हता. आता मात्र त्याने या त्याच्या भूतकाळावर पहिल्यांदाच प्रतिक्रिया दिली आहे.
‘बॉम्बे टाईम्स’ला दिलेल्या मुलाखतीत करण म्हणाला, “ब्रेकअप किंवा घटस्फोट यात काहीही चांगले नाही. मात्र नंतर जेव्हा लोक पुढे जातात तेव्हा त्यांना समजते की ते चांगल्यासाठीच घडले आहे. आणि ते छानही आहे पण माझ्या आयुष्यात घडलेल्या वाईट गोष्टींबाबत मला कोणाशीही बोलण्याची गरज कधीच वाटली नाही कारण लोक येऊन आयुष्यात चाललेल्या वाईट गोष्टींबाबत काही बोलतील अशी माझी अपेक्षाही नाही”. पुढे करण म्हणाला, “हा माझा मुख्य उद्देश नाही. मला काहीसा प्रेम व आनंद पसरवायचा आहे. प्रत्येकाला त्यांच्या आयुष्यातील स्वतःच्या विकृतीला सामोरे जावे लागते आणि मला वाटते की प्रत्येकजण त्यांच्यातील विकृतीसारख्या वैयक्तिक गोष्टी सांभाळण्यासाठी सक्षम आहेत”.
करण सिंग ग्रोवरने २००८ मध्ये टीव्ही अभिनेत्री श्रद्धा निगमबरोबर पहिले लग्न केले. जवळपास वर्षभरानंतर दोघांचा घटस्फोट झाला. यानंतर करणने २०१२ मध्ये जेनिफर विंगेटशी लग्न केले, पण हे नातेही फार काळ टिकले नाही आणि २०१४ मध्ये ते दोघे वेगळे झाले. यानंतर त्याने बॉलिवूड अभिनेत्री बिपाशा बासूशी लग्न केले आणि ते त्यांची लेक देवीचे आई-वडील झाले.