यंदाच्या कान्स फिल्म फेस्टिव्हलनंतर मराठमोळी अभिनेत्री छाया कदम चर्चेत राहिली. यंदाच्या कान्स फिल्म फेस्टिव्हलने भारताच्या शिरपेचात मानाचा तुरा रोवला गेला आहे. ‘All We Imagine As Light’ या भारतीय चित्रपटाला कान्समध्ये नामांकन मिळाले आहे. या चित्रपटात मराठमोळ्या अभिनेत्रीचा गौरव झाला. सोशल मीडियावर तसेच सर्वच स्तरातून छाया कदम यांच्यावर शुभेच्छांचा वर्षाव करण्यात आला. अशातच छाया कदम यांचा दिग्दर्शक वामन केंद्रे यांनी सत्कार केलेला व्हिडीओ सध्या व्हायरल होत आहे. (Chhaya Kadam )
मराठी सिनेविश्वात छाया कदम यांना प्रा. वामन केंद्रे यांनी खूप मोठा ब्रेक दिला आणि त्यांच्या पाठीशी ते कायम राहिले. गुरुंच्या हस्ते विद्यार्थिनीचा होणारा सन्मान सोहळा खूप काही सांगत आहे. या सन्मान सोहळ्याचा व्हिडीओ छाया यांनी त्यांच्या इन्स्टाग्राम अकाउंटवरुन शेअर करत आभार व्यक्त केले आहेत. या व्हिडीओसह कॅप्शन देत त्यांनी असं लिहिलं आहे की, “वामन केंद्रे सरांच्या रंगपीठ या अभिनयाच्या तालमीत जेव्हा खूप वर्षांपूर्वी नकळत पाऊल टाकले तेव्हा ठाऊकही नव्हते की हा प्रवास इतका फुलत-बहरत जाईल. माझ्यासारख्या सर्वसामान्य घरातून आलेली मुलगी अभिनयाच्या क्षेत्रात येते. तेव्हा तिला रोज लहान सहान गोष्टींनी घडवणारे कुबेराचे हात म्हणजे वामन केंद्रे सर”.
पुढे त्या म्हणाल्या आहेत की, “वामन केंद्रे सरांच्या व माझ्या वैयक्तिक पहिल्या म्हणजेच ‘झुलवा’ नाटकापासून सुरु झालेला हा प्रवास आणि विशेष म्हणजे झुलवा नाटकाचा पहिला प्रयोग शिवाजी नाट्यमंदिर येथे झाला होता आणि त्याच शिवाजी नाट्यमंदिरमध्ये आपल्या गुरुंनी आपला सन्मान करावा याहून वेगळा आनंद नाही. आज आपला सगळा प्रवास साता समुद्रापार गौरविला जात आहे. हा आनंद तर आहेच, पण त्याचे बीज, त्याचा अंकुर जर कोणी माझ्या अंगी, माझ्या जगण्यात पेरला असेल तर ते वामन केंद्रे सर आहेत. माझ्यासारख्या कित्येक चेहऱ्यांना घडवणारे सर, माझ्या आयुष्याच्या प्रत्येक वळणावर व चांगल्या वाईट काळातही माझ्या पाठी नेहमी एका भक्कम आपलेपणाच्या आधारासारखे उभे होते. आणि पुढेही वडीलधाऱ्याच्या नात्याने उभे राहतील याची मला खात्री आहे”.
“सर. तुमचे आभार मानून तुम्हाला परके करणार नाही. आयुष्यभर तुमच्या ऋणात राहीन, कारण ‘झुलवा’पासून सुरु झालेला हा माझा प्रवास तुमचे बोट धरुनच सुरु झाला होता, आणि आज चालत-चालत तो इथपर्यंत पोहोचला आहे. खूप प्रेम वामन केंद्रे सर आणि गौरी केंद्रे मॅडम आणि तुम्हा दोघांच्या आशीर्वादाचा हात असाच कायम माझ्या डोक्यावर राहू दे हीच प्रार्थना”.