सोशल मीडियावर महिलांच्या विनयभंगाच्या घटना कानावर येत असतात. सर्वसामान्यच नव्हेतर सेलिब्रिटीही यापासून काही दूर नाहीत. अनेक वेळा काही लोक गर्दीचा फायदा घेऊन किंवा सेल्फी घेण्याच्या बहाण्याने अभिनेत्रींना अस्वस्थ करतात. अशातच एका लोकप्रिय अभिनेत्रीने तिच्याबरोबर घडलेल्या विनयभंगाच्या प्रकारचा खुलासा केला आहे. ही अभिनेत्री म्हणजे हिरामंडी फेम संजीदा शेख. एका क्लबमध्ये तिचा विनयभंग झाला असल्याचा खुलासा अभिनेत्रीने केला आहे. (Sanjeeda Shaikh Incident)
संजय लीला भन्साळी यांच्या ‘हीरामंडी’ या वेबसीरिजमुळे चर्चेत असलेल्या संजीदा शेखने एक धक्कादायक खुलासा केला आहे. अभिनेत्रीने एका मुलाखतीत सांगितले होते की, एकदा तिचा विनयभंग झाला होता आणि तो मुलाने नाही तर मुलीने केला होता. नाईट क्लबमध्ये तिच्याबरोबर हे कृत्य करण्यात आले. ‘हॉटरफ्लाय’शी बोलताना संजीदा शेख म्हणाल्या, “मला एक घटना खूप चांगली आठवते, पण ती एका मुलीने केली होती. मी एका नाईट क्लबमध्ये होते. एक मुलगी माझ्या जवळून जात होती आणि तिने माझ्या स्तनाला स्पर्श केला आणि मला धक्काच बसला. त्यावेळी मला असे झाले की पुरुष तुमच्याबरोबर असे वागतात आणि ते वाईट वागतात, पण मुलीही कमी नाहीत.
संजीदा शेख पुढे म्हणाल्या, “तुम्ही चुकीच्या मार्गावर जात असाल तर याचा अर्थ कोणतीही पर्वा न करता तुम्ही त्यावर चालत आहात. याचा स्त्री-पुरुषांशी काहीही संबंध नाही. जे काही चुकीचे आहे, ते चुकीचे आहे. जर एखाद्या महिलेने तुमच्यावर अन्याय केला असेल तर, तिला सांगा कारण मला वाटते की पीडित असल्याचं ढोंग करणे चुकीचं आहे”.
३९ वर्षीय संजीदा शेखने २००३ मध्ये ‘बागबान’ चित्रपटाद्वारे सिनेसृष्टीत पदार्पण केले. तिने तमिळ, कन्नड व पंजाबी चित्रपटांमध्येही काम केले आहे. ‘क्या होगा निम्मो का’, ‘कयामत’, ‘क्या दिल में है’, ‘पिया का घर प्यारा लगे’ यांसारख्या टीव्ही शोमधून तिने लोकप्रियता मिळवली आहे.