झी मराठी वाहिनीवरील ‘का रे दुरावा’ या मालिकेतून घराघरांत लोकप्रिय झालेली अभिनेत्री म्हणजे सुरुची अडारकर. ‘का रे दुरावा’ मालिकेत सुरुचीने साकारलेली अदिती खानोलकर ही भूमिका खूपच गाजली होती. यानंतर तिने झी मराठी वाहिनीवरील गाजत असलेल्या मालिकेत एंट्री केली. सातव्या मुलीची सातवी मुलगी या मालिकेत ती अस्तिकाच्या भूमिकेतून चाहत्यांच्या भेटीला आली.
सुरुची जवळपास आठ वर्षांनी झी मराठी वाहिनीवर पुनरागमन केल्यामुळे तिच्या चाहत्यांना खूपच आनंद झाला. या मालिकेतील तिची अस्तिकाची भूमिका चांगलीच गाजली. मात्र आता या मालिकेत अस्तिकाचा प्रवास संपला आहे. नुकताच या मालिकेचा एक प्रोमो समोर आला होता, ज्यात नेत्राच्या हातून अस्तिकाचा अंत झाल्याचे पाहायला मिळाले. अशातच आता सुरुचीने स्वत:ही याबद्दलची अधिकृत माहिती दिली आहे. सुरुचीने तिच्या इन्स्टाग्रामद्वारे याबद्दल एक पोस्ट शेअर केली आहे.
सुरुचीने तिच्या इन्स्टाग्राम अकाऊंटद्वारे असं म्हटलं आहे की, “काही गोष्टींचा कालावधी कमी असतो पण तो अल्पायुषी नसतो. मी माझ्या ‘अस्तिका’ या पात्राचा निरोप घेत आहे. मला कधीच वाटले नव्हते की मी हे असं पात्र साकारु शकेन. ‘सातव्या मुलीची सातवी मुलगी’ मालिकेच्या टीमबरोबर काम करणे ही माझ्यासाठी पर्वणी होती. या मालिकेच्या शूटिंगदरम्यानच्या सर्व आठवणींसाठी मी नेहमीच कृतज्ञ असेन. इतक्या कमी वेळेतही तुम्ही माझ्या हृदयाचा खूप मोठा भाग व्यापला आहे.
आणखी वाचा – ‘झलख दिखला जा ११’चं विजेतपद पटकावलं, पण अजूनही मनीषा राणीला मिळाली नाही रक्कम, म्हणाली, “बक्षीसाची रक्कम…”
तसेच यापुढे तिने प्रेक्षकांचे आभार मानत “मायबाप प्रेक्षक, तुमचे विशेष आभार इतकं भरभरून प्रेम दिल्याबद्दल. मी कायम तुमची ऋणी राहीन. असेच कायम आशीर्वाद देत राहा आणि प्रेम करत राहा.” असं म्हटलं आहे. दरम्यान, अस्तिकाच्या पात्राच्या एंट्रीने ‘सातव्या मुलीची सातवी मुलगी’ मालिकेच्या कथानकाला एक वेगळेच वळण आले होते. रुपाली अस्तिकाच्या मदतीने नेत्रा व अद्वैतचा जीव हेणार होती. मात्र नेत्रानेच अस्तिकाचा अंत केल्यामुळे आता मालिकेच्या कथानकाला आणखी एक वेगळे वळण आले आहे.