सध्या राज्यभरात सर्वत्र मराठा आरक्षण हा चर्चेचा विषय आहे आणि ही चर्चा होण्याचे एकमेव कारण म्हणजे मनोज जरांगे पाटील. मराठा आरक्षणासाठी त्यांनी पुकारलेल्या उपोषण आंदोलनामुळे मनोज जरांगे पाटील हे नाव महाराष्ट्राच्या कानाकोपऱ्यात पोहोचले आहे. त्यामुळे त्यांनी मागितलेल्या न्यायाच्या मागणीसाठी मनोज जरांगे पाटील यांनी मुंबईची वाट धरली आहे. मनोज यांनी जालना जिल्ह्यातील अंतरवाली सराटी येथून त्यांच्या या पायी मोर्चाची सुरवात केली असून हा मोर्चा आता मुंबईच्या दिशेने मार्गस्थ होत आहे.
मनोज जरांगे पाटील यांच्या या संघर्षासाठी त्यांना महाराष्ट्रातील जनतेने मोठ्या प्रमाणात पाठींबा दिला आहे. मनोज यांना गावच्या खेड्यापड्यातून पाठिंबा मिळत असल्याचे पाहायला मिळत आहे. अशातच एका मराठी अभिनेत्रीनेदेखील मनोज यांच्या या संघर्षासाठी पाठिंबा दिला आहे. ‘आई कुठे काय करते?’ या मालिकेतील अश्विनी महांगडे या अभिनेत्रीने मनोज यांना पाठिंबा देत त्यांच्या समर्थनार्थ सोशल मीडियावर एक खास पोस्ट शेअर केली आहे.
अश्विनीने मनोज यांचा एक फोटो शेअर करत असे म्हटले आहे की, “साधं फिरायला जाऊन घरी परतलो तरी पुढचे दोन ते तीन दिवस फार दमलो म्हणत आपण काढतो. पण हा माणूस एक भाबडा म्हणावं की वेडा म्हणावं. आलेल्या हजारो संकटांना या माणसाने याच्या सहज बोलण्याने, खरेपणाने परतवून लावले. आज लाखो मुलांच्या डोळ्यात एक स्वप्नं आहे की आता तरी न्याय मिळेल. हा विश्वास या माणसाने त्याच्या आरक्षणाप्रती असलेल्या सातत्याने, समाजाप्रती असलेल्या प्रेमाने निर्माण केला, टिकवला, वाढवला. म्हणूनच आज समाजाचा एक भाग म्हणून या आंदोलनात सोबत करणे हे माझे कर्तव्य वाटते. हा फोटो माणूस म्हणून बघाल तर जीवाची घालमेल होईल”.
पुढे अश्विनी म्हणाली, “टीप – माझे कलाकार म्हणून काम पाहणारे आणि माझ्यावर प्रेम करणारे हे एका समाजाचे नाहीत, तर ते १२ बलुतेदार, १८ पगड जातीचे आहेत. आज मी मराठा आंदोलनात सहभाग दर्शवणे म्हणजे त्या सगळ्या लोकांवर कोणत्याही प्रकारचा अन्याय व्हावा असे अजिबात नाही, समाजातील सर्वच घटकांना समान न्याय मिळावा हेच माझे मत”. दरम्यान, अश्विनीने शेअर केलेली ही पोस्ट सध्या व्हायरल होत असून अनेकांनी या पोस्टला लाईक्स् व कमेंट्सद्वारे चांगलाच प्रतिसाद दिला आहे. तिच्या चाहत्यांसह अनेकांनी अभिनेत्रीच्या या कृतीचे समर्थन केले आहे. त्याचबरोबर कमेंट्समध्ये अनेकांनी तिच्या या समर्थनाला पाठिंबा दर्शवला असल्याचे पाहायला मिळत आहे.
