CID Actor Dinesh Phadnis Dies at 57 : टेलिव्हिजनवरील लोकप्रिय शो ‘सीआयडी’मध्ये फ्रेडरिक्सची भूमिका साकारणारे अभिनेते दिनेश फडणीस यांचे आज मंगळवार (५ डिसेंबर) रोजी वयाच्या ५७ व्या वर्षी निधन झाले. शरीरातील बरेचसे अवयव निकामी झाले असल्याने त्यांचं निधन झालं असल्याचं समोर आलं आहे. मुंबईतील तुंगा रुग्णालयात ते उपचार घेत होते. काल रात्री त्यांना व्हेंटिलेटरवरून काढण्यात आलं. मुंबईत सकाळी १०.३० वाजता अभिनेत्याच्या पार्थिवावर अंत्यसंस्कार होणार आहेत. दिनेश यांच्या निधनाच्या बातमीने सिनेसृष्टीवर शोककळा पसरली आहे.
सीआयडी या शोमध्ये दया यांची भूमिका करणारे अभिनेते दयानंद शेट्टी यांनी त्यांच्या मृत्यूच्या वृत्ताला दुजोरा दिला. त्यांनी इंडियन एक्स्प्रेसला दिलेल्या माहितीनुसार, “दिनेशने १२.०८ वाजता अखेरचा श्वास घेतला” असल्याचं समोर आलं. मुंबईच्या तुंगा रुग्णालयात गेले काही दिवस ते उपचार घेत होते. दिनेश यांची प्रकृती अचानक खालावल्याने त्यांना रुग्णालयात दाखल करण्यात आलं होतं. उपचारादरम्यान त्यांची प्रकृती सुधारत असल्याचं समोर आलं होतं. मात्र आज अचानक त्यांच्या निधनाच्या बातमीने साऱ्यांना धक्का बसला आहे.
हृदयविकाराचा झटका आल्यामुळे त्यांना रुग्णालयात दाखल करण्यात आल्याचं वृत्त समोर आलं होतं. मात्र, ‘सीआयडी’ मालिकेतील दिनेश यांचे सहकलाकार अभिनेते दयानंद शेट्टी यांनी हे वृत्त नाकारले होते. यावेळी दिनेश यांना व्हेंटिलेटरवर ठेवण्यात आल्याचे, शेट्टी यांनी सांगितले होते. त्यानंतर शेट्टी यांनी सांगितलं की, “दिनेश यांना हृदयविकाराचा झटका आला नसून त्यांचं यकृत खराब झालं होतं” असं त्यांनी स्पष्ट केलं.
१९९८ साली प्रसारित झालेल्या सोनी टीव्हीवरील तसेच तब्बल वीस वर्षे प्रेक्षकांच्या मनावर अधिराज्य गाजवलेल्या CID या दीर्घकाळ सुरु असणाऱ्या टीव्ही शोमध्ये फ्रेडरिक्सची भूमिका साकारल्यानंतर दिनेश हे घराघरात लोकप्रिय झाले. ‘सीआयडी’ व्यतिरिक्त ते ‘तारक मेहता का उल्टा चष्मा’ या शोमध्येही दिसले होते. या शोमध्ये त्यांनी छोटीशी भूमिका केली होती. पण त्यांच्या छोट्याश्या भूमिकेने चाहत्यांचे लक्ष वेधून घेतले होते. तसेच आमिर खानच्या ‘सरफरोश’ या चित्रपटातही त्यांनी काम केले होते.
