‘झिम्मा २’ चित्रपटाने बॉक्स ऑफिसवर चांगलाच धुमाकूळ घातला आहे. चित्रपटाच्या प्रदर्शनापूर्वीच चित्रपटाने प्रेक्षकांमध्ये उत्सुकता निर्माण केली होती. चित्रपट प्रदर्शित होताच प्रेक्षकांच्या या उत्सुकतेला पूर्णविराम मिळाला आहे. चित्रपटाला प्रेक्षकांचा प्रचंड प्रतिसाद मिळताना पाहायला मिळत आहे. प्रेक्षकांनी चित्रपटगृहांमध्ये गर्दी केली आहे. हा चित्रपट सध्या कोटींची कमाई करत असल्याचं पाहायला मिळत आहे. (Rinku Rajguru On Jhimma 2)
पहिला आठवडा पूर्ण होऊन चित्रपटाने दुसऱ्या आठवड्यात यशस्वी पदार्पण केलं आहे. ‘झिम्मा’ चित्रपटानेही बॉक्स ऑफिसवर चांगला गल्ला जमवत प्रेक्षकांचं मनोरंजन केलं आहे. ‘झिम्मा’ चित्रपटात आपल्याला सिद्धार्थ चांदेकर, सुहास जोशी, सायली संजीव, क्षिती जोग, सुचित्रा बांदेकर, सोनाली कुलकर्णी व मृण्मयी गोडबोले या कलाकारांचा अभिनय पाहायला मिळाला. तर ‘झिम्मा २’ चित्रपटात सर्व आधीचेच कलाकार असून सोनाली कुलकर्णी व मृण्मयी गोडबोले यांच्या जागी शिवानी सुर्वे व रिंकू राजगुरू यांना घेण्यात आलं. चित्रपटाबाबत रिंकूने एक पोस्ट शेअर केली आहे.
रिंकूने इंस्टाग्राम अकाऊंटवरून शेअर केलेल्या पोस्टने साऱ्यांचं लक्ष वेधून घेतलं आहे. “काय बोलु मी यांच्याबद्दल, या प्रवासात मी नविन आहे, असं मला आजवर कधी जाणवलं नाही. या सगळ्यांसमोर मी आपली इवलुशी,पण या इवलुश्या जिवाला या सगळ्यांनी अगदी अलगदपणे सामावून घेतलं. आपलसं केलं. या प्रवासात तुम्हा सर्वांकडुन खुप शिकले. खूप सुंदर गोष्टी अनुभवायला मिळाल्या. या सगळ्यासाठी सगळ्यांना खुप खूप थॅंक्यु. खूप प्रेम. हेमंत ढोमे दादा थॅंक्यु तू मला ही संधी दिलीस” असं म्हणत तिने सहकलाकारांबरोबरचे फोटो शेअर केले आहेत.
आणखी वाचा – ‘झिम्मा २’ चित्रपटाची विक्रमी कमाई, सात दिवसांतच कमावले ‘इतके’ कोटी
रिंकूच्या या पोस्टवर तिच्या सहकलाकारांनी कमेंट करत हार्ट ईमोजी शेअर केली आहे. तर रिंकूच्या चाहत्यांनी या पोस्टवर कमेंट करत रिंकूच्या अभिनयाचं कौतुक केलं आहे. ‘झिम्मा २’ मध्ये रिंकूने निर्मिती सावंत याच्या सुनेची भूमिका साकारली होती. ही भूमिका रिंकूने अगदी उत्तमरित्या निभावली, त्यामुळे सगळीकडे तिचं भरभरून कौतुक होताना पाहायला मिळत आहे.
