अगदी कमी कालावधी प्रेक्षकांच्या मनावर राज्य करणाऱ्या अभिनेत्रींपैकी एक म्हणजे प्रार्थना बेहरे. मोठ्या पडद्यावर तिने साकारलेल्या भूमिकांनी प्रेक्षकांना आपलसं केलं. मितवा, कॉफी आणि बरंच काही, मस्का यांसारख्या चित्रपटांमध्ये तिने कौतुकास्पद काम केलं. पण लग्नानंतर प्रार्थना चित्रपटांमध्ये फार दिसली नाही. ‘माझी तुझी रेशीमगाठ’ मालिकेमधून तिने छोट्या पडद्यावर कमबॅक केलं. मात्र तिला मोठ्या पडद्यावर पाहण्यासाठी प्रेक्षक आतुर आहेत. याचबाबत तिने आता भाष्य केलं आहे. (Prarthana Behere Talk About Her Honeymoon)
लग्नानंतर प्रार्थनाचं वजन वाढलं होतं. याचविषयी ‘मित्र म्हणे’या पॉडकास्टला दिलेल्या मुलाखतीत प्रार्थना म्हणाली, “२०१७मध्ये माझं लग्न झालं. लग्नाच्या आधी एका वर्षात चार ते पाच चित्रपट मी करत होते. त्याचदरम्यान लग्न ठरलं. लग्न ठरल्यानंतर मी बऱ्याच चित्रपटांना नकार दिला. कारण लग्न केल्यानंतर मला माझ्या नवऱ्याबरोबर आयुष्य एण्जॉय करायचं होतं. म्हणून मी ब्रेक घेतला. पण एवढा मोठा ब्रेक मिळेल असं मला वाटलं नव्हतं. लोक विसरले की, प्रार्थना बेहरेही होती”.
“मोठा ब्रेक झाला याचं सगळ्यात मोठं कारण होतं की, मी खूप जाडी झाली. त्यामुळे लोकांना असं वाटू लागलं की, लग्नानंतर हिने काम बंद केलं, ही जाड झाली म्हणजे गरोदर असणार. टिपिकल मुलींबाबत जो विचार करतात हिचं करिअर आता संपलं असेल तोच विचार माझ्याबाबत करण्यात आला. प्रार्थनाचा नवराच दिग्दर्शक-निर्माता आहे ती आपल्याबरोबर कशाला काम करेल असंही अनेकांना वाटू लागलं होतं. असं करता करता २०१९पर्यंतही मला चित्रपट आला नाही. मात्र त्यावेळी खरंच माझ्याकडे माझ्या नवऱ्याची हिंदी वेबसीरिज होती. तीन वर्ष मी कुठेच दिसली नाही याची मला करोना काळात जाणीव झाली”.
आणखी वाचा – Video : प्रथमेश लघाटेने स्वयंपाक घरात बसून बनवले उकडीचे मोदक, सुकन्या मोने म्हणाल्या, “तुझ्यासारखा…”
“तुझं वजन इतकं कसं वाढलं?” असा प्रश्नही प्रार्थनाला विचारण्यात आला. यावर ती म्हणाली, “मला फक्त एण्जॉय करायचं होतं. जवळपास ४५ दिवस मी हनिमूनला गेले होते. हनिमूनला जाताना मी बारीक होते. पण आल्यानंतर मी आधीची प्रार्थना नव्हते. माझ्या नवऱ्याचंही त्यानंतर असं झालं की, नक्की मी एका अभिनेत्रीबरोबरच लग्न केलं आहे ना?. पण पहिल्यापासून कधीच मी माझ्या वजनाचा विचार केला नव्हता. कारण मी जशी होते तसं मला लोकांनी स्वीकारलं”. प्रार्थना आता तिच्या कामामध्ये अधिकाधिक लक्ष देत आहे.
