Sanjay Dutt Accident : बॉलिवूड स्टार संजय दत्त सध्या साऊथ इंडस्ट्रीत खूप सक्रिय आहे. बॉलिवूडमधून ब्रेक घेत संजय दत्त काहीसा साऊथ चित्रपटसृष्टीकडे वळला आहे. अशातच आता त्याच्या चाहत्यांसाठी एक वाईट बातमी समोर आली आहे. अलीकडेच संजय दत्त त्याच्या आगामी ‘डबल आयस्मार्ट’ चित्रपटाच्या शूटिंग करण्यात व्यस्त आहे. शूटिंग दरम्यान संजय दत्त याचा अपघात झाला असल्याची बातमी समोर आली आहे. चित्रपटाच्या सेटवर तो जखमी झाला असल्याचं कळतंय. या अपघातादरम्यान त्याला खोल दुखापत झाली असून त्याच्या डोक्याला टाके पडले आहेत. संजय दत्त तेलगू अभिनेता राम पोथिनेनीसोबत ‘डबल आयस्मार्ट’ चित्रपटात स्क्रीन शेअर करताना दिसणार आहे.
सूत्रांच्या माहितीनुसार, बँकॉक येथे तलवारबाजीच्या सीन शूट करताना संजय दत्तसोबत ही घटना घडली होती. ज्यामध्ये तो जखमी झाला असून अभिनेत्याच्या डोक्याला टाके पडले आहेत. अपघातानंतर काही वेळातच पुन्हा तो शुद्धीत आला आणि त्याने व्यावसायिक कर्तव्य पार पाडत चित्रीकरण पूर्ण केलं. सूत्रांनी दिलेल्या माहितीनुसार, ही घटना गेल्या आठवड्यात घडली असल्याचं समोर आलं आहे.
‘डबल आयस्मार्ट’ हा चित्रपट पुरी जगन्नाध यांनी दिग्दर्शित केला आहे. संजय दत्त यांच्यासाठी हा चित्रपट त्यांचं तेलुगु चित्रपटसृष्टीतील पदार्पण म्हणावं लागेल. तर ‘KGF: Chapter 2’ चित्रपटाद्वारे त्याने कन्नड चित्रपटसृष्टीत पदार्पण केलं आहे. संजयने ‘डबल आयस्मार्ट’ मधील त्याचा पहिला लूकही प्रेक्षकांसमोर आणला आहे.
या पोस्टरमधील त्याचा लुक शहरातल्या माणसासारखा दिसतोय. याशिवाय, संजय दत्त त्याच्या आगामी ‘लिओ’ या चित्रपटाद्वारे तमिळ चित्रपटसृष्टीतही उतरणार आहे, ज्यामध्ये तो तमिळ सुपरस्टार थलापथी विजय आणि त्रिशा यांच्यासोबत स्क्रीन शेअर करणार आहे. या चित्रपटाचे दिग्दर्शन लोकेश कनगराज यांनी केले आहे.
