Siddharth Chandekar Mother New Business : मराठमोळा अभिनेता सिद्धार्थ चांदेकर नेहमीच चर्चेत असतो. मालिका, चित्रपट यांमधून सिद्धार्थने प्रेक्षकांच्या मनात घर केलं. सोशल मीडियावरही सिद्धार्थ बऱ्यापैकी सक्रिय असतो. नेहमीच तो काही ना काही शेअर करत चाहत्यांच्या संपर्कात राहत असतो. सिद्धार्थबरोबर त्याची पत्नी मिताली मयेकर व आई सीमा चांदेकर दोघीही कलाक्षेत्रात कार्यरत आहेत. सिद्धार्थची आई सीमा सध्या सिनेविश्वात सक्रिय नसल्या तरी त्या वैयक्तिक आयुष्यामुळे चर्चेत असलेल्या पाहायला मिळतात. अशातच सिद्धार्थने त्याच्या आईसाठी शेअर केलेल्या एका खास पोस्टने साऱ्यांचं लक्ष वेधलं आहे. सिद्धार्थची ही पोस्ट त्याच्या आईसाठी कौतुकास्पद व अभिमानास्पद असल्याची आहे.
सिद्धार्थची आई सीमा चांदेकर यांनी व्यवसाय क्षेत्रात पाऊल टाकलं आहे. त्यांनी स्वतःचा व्यवसाय सुरु केला आहे. पुण्यात त्यांनी घरगुती खाद्यपदार्थांचा हा व्यवसाय सुरु केला आहे. सीमा चांदेकरांच्या या नव्या दुकानात केवळ घरगुती पदार्थांनाच प्राधान्य दिलं आहे. याबाबत सिद्धार्थनेही त्याच्या पोस्टमध्ये सांगितलं आहे. सीमा यांच्या या नव्या खाद्य व्यवसायाचे नाव ‘सीमा फूड्स’ असे आहे.
“नवीन बिज़नेस! नवीन innings! मला तुझा अभिमान आहे आई. पुण्यात आरण्येश्वर चौकात माझ्या आईचं नवं दुकान. सर्व घरगुती गोष्टी. जरुर भेट द्या”, असं कॅप्शन देत सिद्धार्थने त्याच्या आईच्या नव्या दुकानाची झलकही दाखविली आहे. सिद्धार्थच्या या पोस्टवर कलाक्षेत्रातील अनेक कलाकार मंडळींनी कमेंट करत त्यांच्यावर शुभेच्छांचा वर्षाव केला आहे. तर नेटकऱ्यांनी सिद्धार्थच्या आईला कमेंटद्वारे शुभेच्छा दिल्या आहेत.
आणखी वाचा – ‘वाकडतोंडी’ म्हणत पारूबरोबरचा फोटो शेअर करणं अभिनेत्याला पडलं महागात, कमेंट करत म्हणाली, “स्वतःच किती…”
सिद्धार्थ चांदेकरच्या आईने दुसरं लग्न केलं यावेळी ही त्या चर्चेत आल्या होत्या. सिद्धार्थ व मिताली या दोघांनी पुढाकार घेत त्यांच्या आईचं म्हणजेच सीमा चांदेकर यांचं दुसरं लग्न लावलं. . अनेकांनी या गोष्टीमुळे त्यांचं भरभरुन कौतुकही केलं. आता सिद्धार्थच्या आईने म्हणजेच सीमा यांनी त्यांचे पती नितीन यांच्या साथीने हा व्यवसाय सुरु केला आहे. या सीमा फूड्सच्या नावाच्या पाटीवर प्रोपा. सीमा नितीन असे नाव दिसत आहे.
