Zee Marathi Tejashri Pradhan New Serial : ‘झी मराठी’ वाहिनीवर आलेल्या ‘वीण दोघांतली ही तुटेना’ या नव्या मालिकेच्या प्रोमोने साऱ्यांचं लक्ष वेधलं आहे. या नव्याकोऱ्या मालिकेतून मालिका आणि चित्रपटविश्वातील दोन लोकप्रिय चेहरे प्रेक्षकांच्या मनात घर करायला सज्ज झाले आहेत. अभिनेत्री तेजश्री प्रधान आणि अभिनेता सुबोध भावे ही जोडी या मालिकेतून मालिकाविश्व गाजवायला सज्ज झाली आहे. मालिकेच्या प्रसारणाची वेळ अद्याप समोर आलेली नाही, मात्र ही मालिका लवकरच सिनेरसिकांच्या भेटीस येणार आहे. मालिकेच्या समोर आलेल्या पहिल्याच प्रोमोने मालिकेप्रती उत्सुकता वाढविली आहे.
‘वीण दोघांतली ही तुटेना’ या मालिकेत तेजश्री ‘स्वानंदी’ तर, सुबोध ‘समर’ ही भूमिका साकारताना दिसणार आहेत. प्रेक्षकांना समर आणि स्वानंदीची अनोखी प्रेमकहाणी या मालिकेतून पाहायला मिळणार आहे. समोर आलेल्या प्रोमोमध्ये दोघांची आलिशान रेस्टारंटमध्ये भेट होते. आपल्या भावा-बहिणीचं लग्न कुठे होईल, कसं होईल याबाबत ते चर्चा करताना दिसत आहेत. पण, यादरम्यान स्वतःच्या लग्नाबद्दल ते काहीच ठरवत नाहीत. स्वानंदी तिच्या भावाच्या सुखासाठी समरशी लग्न करण्याचा निर्णय घेते. तर, समर बहिणीसाठी स्वानंदीशी लग्न करणार असल्याचं प्रोमोवरुन समजतंय.
आणखी वाचा – मालिकेत अपघात, मृत्यूचा सीन शूट होताना कलाकारावर नारळ ओवाळून काढतात नजर, मराठी अभिनेत्रीने दाखवलं सत्य
मालिकेचा प्रोमो पाहताच प्रेक्षकांनी लाईक्सचा वर्षाव केला आहे. तर काहींनी मालिकेला हिंदी मालिकेची कॉपी असल्याचं म्हणत ट्रोल करण्याचा प्रयत्न केला आहे. थेट कमेंटमध्ये या मालिकेचा नवा प्रोमो पाहून मालिकेला ट्रोल केलं जातं आहे. “फायनली ‘बड़े अच्छे लगते है’चा मराठी रिमेक आला”, “सिरीयल बडे अच्छे लगते है, संगीत खुलता कळी खुलेना, ओरिजिनल काही आहे का?” “ही मालिका ‘बड़े अच्छे लगते है’ सीरियलचा रिमेक वाटतेय पण, तेजश्री असल्याने आम्ही ही मालिका जरुर पाहणार”, “मालिका भलेही रिमेक असूदेत पण कलाकार खरंच खूप चांगले घेतले आहेत त्यामुळे आपण मालिकेला सपोर्ट केलं पाहिजे”, “बड़े अच्छे लगते है मराठीमध्ये आलेली दिसत आहे”, “हिंदीची कॉपी का केली?” अशा प्रतिक्रिया नेटकऱ्यांनी या प्रोमोवर केल्या आहेत.
प्रोमोला मिलियन व्ह्यूज असूनही मालिकेचा प्रोमो पाहून मालिका ट्रोल होत आहे. अनेकांनी आपला ओरिजिनल कंटेंट का नाही असा सवाल केला आहे. दरम्यान, किती काही असलं तरी तेजश्री व सुबोधचा असलेला मोठा फॅन या मालिकेची आतुरतेने वाट पाहत आहे.
