मराठी रंगभूमीतील लोकप्रिय अभिनेत्यांपैकी एक म्हणजे अभिनेते प्रशांत दामले. तब्बल तीन दशकांहून अधिक काळ त्यांनी स्वतःला रंगभूमीला वाहून घेतले असून आपल्या अभिनयाने त्यांनी अनेकदा प्रेक्षकांची मने जिंकली आहे. प्रशांत दामले यांनी आतापर्यंत सुमारे ३२ नाटकांचे तब्बल १२ हजार पाचशेंहून अधिक प्रयोग करत जागतिक विक्रम रचला आहे. त्यामुळेच त्यांना रंगभूमीतील विक्रमवीर अभिनेते म्हणूनही ओळखले जाते. केवळ अभिनयच नाही, तर नाट्य निर्मितीक्षेत्रातही आपलं नशीब अजमावत आहे. त्यांच्या बॅनरअंतर्गत बनलेल्या ‘एका लग्नाची पुढची गोष्ट’, ‘सारखं काहीतरी होतंय’, ‘नियम व अटी लागू’ यांसारख्या नाटकांना प्रेक्षकांचा प्रतिसाद मिळत आहे. (Vishnudas Bhave Medal Award announced to Prashant Damle)
रंगभूमीतील त्यांच्या या योगदानाबद्दल आतापर्यंत संगीत नाटक अकादमीच्या पुरस्कारांसह अनेक पुरस्कारांनी त्यांना सन्मानित करण्यात आलेले आहे. त्यात आता आणखी एका पुरस्काराची भर पडली आहे. अखिल भारतीय महाराष्ट्र नाट्य विद्यामंदिर यांच्या वतीने देण्यात येणारा मराठी रंगभूमीतील सर्वात प्रतिष्ठेचा विष्णुदास भावे पदक पुरस्कार यावर्षी अभिनेते प्रशांत दामले यांना जाहीर झाला आहे. गौरवपदक, २५ हजार रुपये रोख, स्मृतीचिन्ह, शाल आणि श्रीफळ असं या पुरस्काराचं स्वरुप आहे. येत्या ५ नोव्हेंबरला मराठी रंगभूमी दिनी त्यांना या पुरस्काराने सन्मानित केले जाणार आहे. यावेळी त्यांच्या नावाची घोषणा होताच चाहत्यांनी कौतुक करत त्यांचे अभिनंदन केले.
हे देखील वाचा – “आता घर, आपली माणसं आणि…”, अमेरिकेमध्ये राहिलेल्या सुप्रसिद्ध मराठी अभिनेत्रीला भारतात परतण्याचे वेध, म्हणाली, “मायदेशी…”
१९८३ मध्ये ‘टूरटूर’ या नाटकातून प्रशांत दामले यांनी रंगभूमीवर पदार्पण केले. त्यानंतर त्यांनी ‘मोरूची मावशी’, ‘गेला माधव कुणीकडे’, ‘बे दुणे चार’, ‘शूSS कुठे बोलायचं नाही’, ‘एका लग्नाची गोष्ट’, ‘कार्टी काळजात घुसली’ यांसारखी अनेक नाटक केली आहेत. सध्या त्यांचं ‘सारखं काहीतरी होतंय’ आणि ‘एका लग्नाची पुढची गोष्ट’ हे नाटक रंगभूमीवर सुरु आहेत. केवळ अभिनेते नव्हे, तर गायक, पार्श्वगायक, नाट्यनिर्माते यांसारख्या भूमिकेमधून त्यांनी रंगभूमीवर एक वेगळीच छाप पाडली आहे. त्याचबरोबर, अनेक चित्रपट व मालिकांमध्येदेखील ते झळकलेले आहेत.
हे देखील वाचा – डोळा व चेहरा सुजला अन्…; अमेरिकेमध्ये सुप्रसिद्ध मराठी अभिनेत्याची झाली बिकट अवस्था, म्हणाला, “डॉक्टर होते पण…”
प्रशांत यांना संगीत नाटक अकादमी पुरस्कारांसह अनेक पुरस्कारांनी गौरविण्यात आलेलं असून त्यांच्या नावावर पाच लिम्का बुक ऑफ रेकॉर्ड्स आहेत. तसेच, ते अखिल भारतीय नाट्य परिषदेचे अध्यक्षपददेखील भूषवत आहे. प्रशांत यांनी विविध नाटकांमधून अनेक भूमिका साकारल्या असून त्या सर्व भूमिकांना प्रेक्षकांचे भरभरून प्रेम मिळाले आहे. अश्या या दिग्गज अभिनेत्याला विष्णुदास भावे पुरस्काराने गौरवण्यात येणार असल्यामुळे त्यांच्या चाहत्यांना व नाट्यप्रेमींना आनंद झाला आहे.
