Vishal-Akshaya Wedding : ‘बिग बॉस मराठी’ सिझन ३ चा विजेता आणि ‘येड लागलं प्रेमाचं’ या मालिकेमुळे घराघरात पोहोचलेला अभिनेता विशाल निकम सध्या खास कारणामुळे चर्चेत आहे. काही दिवसांपूर्वी विशालने आपल्या प्रेमाची कबुली देत चाहत्यांना आनंदाचा धक्का दिला होता. त्यानंतर अभिनेता विशाल निकम आणि अभिनेत्री अक्षया हिंदळकर यांचा साखरपुडा तसेच हळदी समारंभ पार पडल्याच्या बातम्यांनी सोशल मीडियावर जोरदार चर्चा रंगली होती.
आता या चर्चांना पूर्णविराम देत विशाल आणि अक्षया विवाहबंधनात अडकले आहेत. विशेष म्हणजे १० फेब्रुवारी रोजी विशालचा वाढदिवस असून, याच खास दिवशी दोघांनी लग्नगाठ बांधली. वाढदिवस आणि लग्न असा दुहेरी आनंद एकाच दिवशी साजरा करत विशालने आयुष्यातील नवा अध्याय सुरू केला आहे. अद्याप दोघांच्या लग्नाचे अधिकृत फोटो सोशल मीडियावर शेअर झालेले नाहीत. मात्र विशालने आपल्या इन्स्टाग्राम स्टोरीद्वारे चाहत्यांना ही आनंदाची बातमी दिली. त्याने लिहिलं, “आज १० फेब्रुवारी २०२६ माझा वाढदिवस! सर्वांच्या शुभेच्छांसाठी मनापासून धन्यवाद. प्रवासाच्या घाईमुळे फोन किंवा संदेशांना उत्तर देता आलं नाही, त्याबद्दल क्षमस्व. आजच्या या पवित्र दिवशी महादेव आणि माता पार्वती यांच्या आशीर्वादाने मी आणि माझी सखी अक्षयाने सात जन्मांची गाठ बांधली. लग्न सोहळा सुफळ संपूर्ण पार पडला. फोटो उद्या अपडेट करेन. हर हर महादेव.” असं लिहीत त्याने भावना व्यक्त केल्या आहे.
अखेर विशालने लग्नाचा सुंदर व्हिडीओ शेअर करत आपल्या पत्नींसाठी खास पोस्ट लिहिली. या जोडप्याचा साखरपुडा हरिद्वारमध्ये पार पडला होता. त्यानंतर उत्तराखंडमधील पवित्र मंदिरात अत्यंत पारंपरिक पद्धतीने विवाहसोहळा संपन्न झाला. लग्नासाठी दोघांनीही पारंपरिक पेहराव केला होता. अक्षया नारंगी रंगाच्या सुंदर लेहंग्यात, हातात हिरव्या बांगड्यांचा चुडा आणि पारंपरिक दागिन्यांमध्ये अत्यंत देखणी दिसत होती. तर विशालनेही पारंपरिक वेषात सर्वांचे लक्ष वेधून घेतले. लग्नाचा व्हिडीओ शेअर करत विशालने लिहिले, “चंद्रभागेसारखं प्रेम आपलं सखी… मी तुझ्यात सामावून जाईन. रुसली जरी तू रखुमाईसारखी, मी सावळा विठ्ठल होऊन जाईन… कायम तुझा रुसवा काढत तुला आयुष्यभर मनवत राहीन. १० फेब्रुवारी २०२६!” विशालच्या या पोस्टने चाहत्यांचे मन जिंकले आहे. व्हिडीओ पाहून नेटकऱ्यांनी या नव्या जोडीवर शुभेच्छांचा वर्षाव केला आहे.
