Katrina Kaif Pregnant : बॉलिवूड अभिनेत्री कतरिना कैफबद्दल बरेच दिवसांपासून चर्चा सुरु होती. वृत्तानुसार, अभिनेत्री गरोदर असल्याचं म्हटलं जातं होतं. इतकंच नाहीतर ती ऑक्टोबर किंवा नोव्हेंबरमध्ये आपल्या पहिल्या मुलाला जन्म देऊ शकते असेही अनुमान काढले गेले. कतरिना कैफ किंवा तिचा नवरा विक्की कौशल यांनी या बातमीच्या कोणत्याही अधिकृत पुष्टीकरणाची पुष्टी केली नव्हती. त्यामुळे या चर्चा खऱ्या आहेत की नाही यावर अनेकांना प्रश्न होता. अखेर आता कतरीनाने या चर्चांवर मौन सोडलं आहे. अभिनेत्रीने सोशल मीडियाद्वारे लवकरच आई होणार असल्याची गुडन्यूज दिली आहे.
कतरीनाने इंस्टाग्राम अकाउंटवर आई होणार असल्याची पोस्ट शेअर केली आहे. तिची ही पोस्ट पाहून अनेकांना आनंद झाला आहे. वयाच्या ४२ व्या वर्षी अभिनेत्रीने गर्भधारणेबद्दल सांगितलं आहे. “आनंद आणि कृतज्ञतेने भरलेल्या अंतःकरणासह आपल्या आयुष्यातील सर्वोत्तम अध्याय सुरु करण्याच्या मार्गावर आहोत”, असं कॅप्शन देत कतरीना आणि विकीने एक सुंदर असा फोटो शेअर केला आहे.
कतरीना बेबी बंप दाखवताना या फोटोमध्ये दिसत आहे तर विकीने बेबी बंपला धरलं आहे. दोघांचा हा सुंदर असा फोटो बरंच काही सांगून जात आहे. कतरीना आणि विकी आई-बाबा होणार असल्याचं समोर येताच त्यांच्या चाहत्यांमध्येही आनंदाचं वातावरण पाहायला मिळत आहे. त्यांच्या या पोस्टवर चाहत्यांनी शुभेच्छांचा वर्षाव केला आहे.
