मराठी मनोरंजनसृष्टीतील सुप्रसिद्ध ज्येष्ठ अभिनेते प्रदीप वेलणकर यांनी अनेक नाटक, चित्रपट व मालिकांमधून प्रेक्षकांचे मनोरंजन केले आहे. एअर इंडियामध्ये नोकरी करत असताना त्यांना अभिनयाची प्रचंड आवड होती. त्यामुळेच नोकरीनंतर ते अनेकदा विविध नाटक व एकांकिका करत होते. मात्र, काही काळानंतर प्रदीप यांनी नोकरीचा राजीनामा दिला आणि त्यांनी अभिनय क्षेत्रात स्वतःला पूर्णपणे झोकून घेतले. ‘बॅरिस्टर’ या नाटकामधून प्रचंड लोकप्रियता मिळाल्यानंतर त्यांनी अनेक नाटक, मालिका व चित्रपटांमध्ये काम केले आहे. त्याचबरोबर, हिंदी चित्रपटांमधूनही त्यांनी प्रेक्षकांची मने जिंकली आहे. प्रदीप वेलणकर हे गेल्या ४८ वर्षांपासून अभिनय क्षेत्रात सक्रिय असून त्यांनी साकारलेल्या प्रत्येक भूमिकेला प्रेक्षकांचे प्रेम मिळाले आहेत. (Pradeep Velankar 75th Birthday Celebration)
अश्या या प्रसिद्ध ज्येष्ठ अभिनेत्याने नुकतीच वयाची पंच्याहत्तरी पार केली आहे. प्रदीप वेलणकर यांच्या ७५व्या वाढदिवसानिमित्त एका विशेष सोहळ्याचे आयोजन करण्यात आले होते. या सोहळ्याला त्यांची पत्नी व अभिनेत्री रजनी वेलणकर, मुली मीरा व मधुरा वेलणकर, जावई अभिजित साटम व कुटुंबातील अन्य सदस्य उपस्थित होते. तसेच, ज्येष्ठ अभिनेते शिवाजी साटम, अशोक सराफ, अभिनेत्री वंदना गुप्ते, ईला भाटे, चिन्मयी सुमित यांसारख्या अनेक कलाकार मंडळींनी देखील या सोहळ्याला हजेरी लावली होती. सोशल मीडियावर या सोहळ्याचे फोटोज समोर आले आहेत. ज्यामध्ये संपूर्ण कुटुंबीय या सोहळ्याचा आनंद लुटताना दिसत आहे.
हे देखील वाचा – “महाराष्ट्रात घडणारा हिंदी चित्रपट हवा”, सुप्रसिद्ध मराठी चित्रपटाच्या लेखकाची पोस्ट चर्चेत, म्हणाला, “मराठी माणंस, संस्कृती…”
प्रदीप वेलणकर यांनी ‘या गोजिरवाण्या घरात’, ‘असंभव’, ‘माझी तुझी रेशीमगाठ’, ‘जिवाची होतिया काहिली’ यांसारख्या मालिकांमध्ये प्रमुख भूमिका साकारल्या आहेत. त्याचबरोबर ‘चकवा’, ‘रॉकी’, ‘बकेट लिस्ट’ या मराठी चित्रपटांसह ‘सिंघम’, ‘पेज थ्री’ या हिंदी चित्रपटांमध्ये आपल्या अभिनयाची जादू दाखवली आहे. लवकरच ते ‘बटरफ्लाय’ या चित्रपटातून मोठ्या पडद्यावर कमबॅक करणार आहे. ज्यामध्ये ते मधुरा वेलणकरसह स्क्रीन शेअर करताना दिसणार आहेत.