Gangaram Gavankar Death : कोकणातील बोलीभाषेला कलात्मक रुप देण्यात हातखंड असलेले आणि मराठी नाटकाच्या इतिहासातील एक अविभाज्य भाग म्हणजे अभिनेते गंगाराम गवाणकर. मराठी रंगभूमीवरील एक गाजलेलं नाव गंगाराम गवाणकर यांचं निधन झालं आहे. वयाच्या ८६ व्या वर्षी त्यांनी अखेरचा श्वास घेतला. २७ ऑक्टोबर २०२५ रोजी त्यांचं दहिसर (पूर्व) येथील एका खासगी रुग्णालयात निधन झाल्याचं समोर आलं. गेल्या काही महिन्यांपासून त्यांची प्रकृती ठीक नव्हती. अशातच उपचारादरम्यान त्यांची प्राणज्योत मालवली.
ज्येष्ठ अभिनेते गंगाराम गवाणकर यांच्या निधनाने मराठी नाट्यविश्वाने एक सर्जनशील, लोकभाषेचा प्रामाणिक पुरस्कर्ता गमावला आहे. मराठी रंगभूमीवर मालवणी नाटकांची रांग लावण्यात गवाणकर यांचा मोठा हात होता. ‘वेडी माणसे’ हे त्यांचे पहिले नाटक होते. त्यानंतर ‘दोघी’, ‘वर भेटू नका’, ‘वरपरीक्षा’ यांसारखी अनेक नाटके त्यांनी स्वतः लिहिली. ‘वात्रट मेले’ या नाटकाचे तब्बल दोन हजारांहून अधिक प्रयोग झाले, तर ‘वन रुम किचन’ या नाटकाने हजारावर प्रयोगांद्वारे प्रेक्षकांचे मनोरंजन केले.
मराठी रंगभूमीवर मालवणी भाषेची प्रतिष्ठा वाढवण्यात वस्त्रहरण या नाटकाने महत्त्वाची भूमिका बजावली आणि मच्छिंद्र कांबळी यांच्यासारखा मालवणी नटसम्राट घडवला. वस्त्रहरणचे तब्बल पाच हजारांहून अधिक प्रयोग झाले. या नाटकाच्या लेखनाची जबाबदारी गंगाराम गवाणकर यांनी उत्तमरीत्या सांभाळली. १९७१ मध्ये त्यांनी रंगभूमीवरील प्रवासाची सुरुवात ‘बॅकस्टेज’वरुन केली. त्याच काळात ते ‘एमटीएनएल’मध्ये नोकरी करत होते, पण नाट्यकलेवरील त्यांचे प्रेम त्यांना शांत बसू देत नव्हते. यावेळी अभिनय आणि नोकरी अशी दुहेरी भूमिका त्यांनी बजावली.
