Dhanashri Kadgaonkar Video : ज्येष्ठ महिन्यातील वटपौर्णिमा काल साजरी करण्यात आली. यंदाची वटपौर्णिमा अनेक अभिनेत्रींनींही उत्साहात साजरी केली. सोशल मीडियावर या अभिनेत्रींच्या वटपौर्णिमा स्पेशल व्हिडीओ तुफान व्हायरल होताना दिसले. यंदाच्या या वटपौर्णिमेला अनेक नवीन लग्न झालेल्या अभिनेत्रींनीं सहभाग घेतला. रेश्मा शिंदे, शिवानी सोनार, अंकिता वालावलकर, दिव्या पुगांवकर, वैष्णवी कल्याणकर या अभिनेत्रींनी त्यांची पहिली वटपौर्णिमा अगदी थाटामाटात साजरी केली. तर याशिवाय काही अभिनेत्रींनी शूटिंगच्या व्यस्त श्येड्युलमधून वेळात वेळ काढून सेटवरच वटपौर्णिमा साजरी केली. यादरम्यान, मालिकाविश्वातील एका अभिनेत्रीने साजरी केलेली वटपौर्णिमा लक्ष वेधून घेत आहे.
तब्बल लग्नाच्या ११ वर्षानंतर या अभिनेत्रीने पहिल्यांदाच वटपौर्णिमा साजरी केली. याबाबतचा तिने खुलासा केला आहे. ज्याने सगळ्यांच्या नजरा तिच्याकडे लागून राहिल्या आहेत. ही अभिनेत्री म्हणजे धनश्री काडगांवकर. धनश्री काडगांवकरने आजवर अनेक मराठी मालिकांमधून महत्त्वपूर्ण भूमिका साकारत रसिक प्रेक्षकांची मन जिंकली आहेत. सोशल मीडियावरही धनश्री बऱ्यापैकी सक्रिय असते. नेहमीच ती काही ना काही शेअर करत चाहत्यांच्या संपर्कात असते.
आता अभिनेत्रीने तिच्या लग्नानंतरच्या साजऱ्या केलेल्या पहिल्या वटपौर्णिमेचा व्हिडीओ शेअर केला आहे. अभिनेत्रीने लग्नाच्या ११ वर्षांनंतर पहिल्यांदाच ही वटपौर्णिमा साजरी केली. अभिनेत्रीने अगदी मराठमोळ्या लूकमध्ये वडाच्या पूजेसाठी हजेरी लावली. यावेळी तिने हिरव्या रंगाची काठपदरची साडी, नाकात नथ परिधान करत पारंपरिक लूक केला होता. अभिनेत्रीने सांगितलं की, शूटींगमुळे तिला वटपौर्णिमेची पूजा करता आली नव्हती. यंदा तिच्याकडे ही संधी येताच तिने अगदी मनापासून वटपौर्णिमा साजरी केली.
हा व्हिडीओ शेअर करत धनश्री म्हणाली, “लग्न झाल्यापासून खऱ्या आयुष्यात वटपौर्णिमा कधी केलीच नाही. तसा कधी वेळच मिळाला नाही. हा पण मी केलेल्या प्रत्येक मालिकेमध्ये अगदी आवर्जून नटून-थटून ही पूजा केली. म्हणलं, चला या वर्षी मार्गदर्शनाला आई पण आहे तर करुया. खऱ्या आयुष्यात याचे १०० शॉट्स घ्यायचे नसतात. सात म्हणजे सातच फेरे. फोटो आणि व्हिडीओसाठी काही कमी जास्त नाही. त्यामुळे तेवढ्यात जितकं फुटेज मिळालं तितकंच. तर खऱ्या आयुष्यातील ही माझी पहिली वटपौर्णिमा. दुर्वेश हे तुझ्यासाठी. आता पुढील सात जन्म तुला मला सहन करावं लागणार आहे”.
