छोट्या पडद्यावरील ‘तुला शिकवीन चांगलाच धडा’ ही मालिका सध्या प्रेक्षकांमध्ये प्रचंड चर्चेत आहे. मालिकेत अक्षरा-अधिपती यांची जोडी प्रेक्षकांची अत्यंत आवडती जोडी बनली आहे. या मालिकेतील प्रत्येक कलाकार प्रेक्षकांच्या कौतुकाला पात्र ठरला आहे. त्यातच मालिकेतील भुवनेश्वरी आणि अधिपतीबरोबरच अक्षरानेही चाहत्यांच्या मनात घर केलं आहे. मालिकेत ही भूमिका शिवानी रांगोळे साकारते आहे. त्यामुळे तीदेखील चाहत्यांमध्ये चर्चेत राहत असते. अशातच आता पुन्हा एकदा शिवानी सोशल मीडियावर चर्चेत आली आहे आणि याच कारण म्हणजे अभिनेत्रीने शेअर केलेला फोटो.
‘तुला शिकवीन चांगलाच धडा’ या मालिकेत शिवानी रांगोळे साकारत असलेल्या अक्षराच्या भूमिकेला प्रेक्षकांचा चांगला प्रतिसाद मिळत आहे. अभिनयासह शिवानी सोशल मीडियावरही बऱ्यापैकी सक्रिय असते. ती तिच्या आयुष्यातील घडामोडी, सेटवरच्या गंमती-जमती नेहमीच सोशल मीडियावरुन शेअर करत असते. अशातच तिने शेअर केलेला एक फोटो सध्या सर्वांचे लक्ष वेधून घेत आहे. शिवानीने तिच्या मालिकेतील खास लूकमधील फोटो शेअर केला आहे. या फोटोमध्ये तिच्या हातात विळादेखील पाहायला मिळत आहे.
शिवानीने तिच्या इन्स्टाग्राम अकाऊंटद्वारे तिचा हातात विळा घेतलेला आणि भगव्या रंगाची साडी नेसलेला अगदी गावरान फोटो शेअर केला आहे. तिचा हा फोटो बघून चाहत्यांनी तिच्यावर लाइक्स आणि कमेंट्सचा पाऊस पाडला आहे. शिवानीच्या या फोटोवर चाहत्यांनी “आता कोल्हापूरकर म्हणून शोभत आहात”, “मास्तरीन बाई, “विषय हार्ड केलाय की”, ‘मास्तरीन बाई झाल्या शेतकरीण”, “अप्रतिम” अशा अनेक कमेंट्स करत शिवानीच्या लूकचे कौतुक केलं आहे.
आणखी वाचा – Video : पडद्यामागे तबला वाजवू लागले अरुण कदम, नाटकाच्या प्रयोगापूर्वी बॅकस्टेज धमाल, व्हिडीओ व्हायरल
दरम्यान, शिवानीचा हा लूक मालिकेतील आगामी भागाबद्दलचा असल्याचे म्हटलं जात आहे. भुवनेश्वरीने अधिपती व अक्षरा यांना घरातून बाहेर काढल्यानंतर दोघेही मिळेल ते काम करत आहेत. त्यामुळे आता मास्तरीनबाई शेतीदेखील करणार आहेत की? असा प्रश्न चाहत्यांना पडला आहे.