‘महाराष्ट्राची हास्यजत्रा’ या विनोदी कार्यक्रमाने रसिक प्रेक्षकांच्या मनाचा ताबा घेतलाय. या कार्यक्रमाचा चाहतावर्गही खूप मोठा आहे. या कार्यक्रमातील प्रत्येक कलाकार ही नेहमीच चर्चेत असतात. या कलाकारांचं, त्यांच्या स्किटचं, तसेच त्यांच्या भूमिकांचा सर्वत्र कौतुक होताना दिसतं. संपूर्ण महाराष्ट्रात नव्हे तर भारताबाहेरही या लोकप्रिय कार्यक्रमाचा खूप मोठा चाहतावर्ग आहे. या कार्यक्रमाचे ‘कॅप्टन ऑफ द शिप’ तसेच सर्वस्व मानले जाणारे लेखक दिग्दर्शक म्हणजे सचिन गोस्वामी आणि सचिन मोटे. पडद्यामागे राहून आज ‘महाराष्ट्राची हास्यजत्रा’ या कार्यक्रमाचे जे काही नाव आहे ते या जोडीमुळेच आहे. (Sachin Goswami and Sachin Mote)
सचिन गोस्वामी आणि सचिन मोटे नेहमीच कोणत्या ना कोणत्या आशयघन विषयावर भाष्य करताना दिसतात. एखाद्या विषयावर भाष्य करत ते त्यांची बाजू सोशल मीडियाच्या माध्यमातून शेअर देखील करतात. अशातच नुकतीच त्यांनी भार्गवी चिरमुलेच्या ‘गप्पा, मस्ती, पॉडकास्ट’ या युट्युब चॅनेलला मुलाखत दिली. यावेळी सचिन मोटे आणि सचिन गोस्वामी यांनी विविध विषयावर चर्चा केली. दरम्यान त्यांनी मराठी व हिंदी कलाकार यांच्यात जाणवणाऱ्या तफावतीबद्दल भाष्य केलं. तसेच मराठी कलाकारांना हिंदी भाषेत काम करताना पाहून त्यांच्यावर होणाऱ्या ट्रोलिंग बाबतही त्यांनी भाष्य केलं आहे.
मराठी कलाकारांची बाजू सांभाळत सचिन मोटे म्हणाले, “मराठी कलाकार हिंदीमध्ये गेला की म्हणता ‘क्या बात हैं’, आमचा एक मराठी कलाकार हिंदीमध्ये गेला. हिंदी कलाकार मराठीमध्ये येऊन बसले की म्हणता यांना कशाला आणता मराठीच्या मंचावर, ‘आपल्याकडे काय माणसं कमी आहेत का?’ हिंदीत काही संवाद बोलले की लोकांच्या भावना दुखावतात, तर दुसरीकडे हिंदीमध्ये काम करण्याची त्याला प्रतिष्ठा देता. एखादा हिंदी कलाकार तोडक्या मोडक्या मराठीत बोलला की आपल्या इथे त्याच कौतुक करतात, क्या बात हैं, मराठीत बोलला वगैरे कमेंट करतात. मात्र मराठी भाषेतला विनोद मराठी कलाकारानेच केला तर तुम्ही काय आपली भाषा कशाही पद्धतीने बोलताय, असं म्हणता. किंवा समीर चौघुले असं हिंदी का बोलतोय, याने हिंदीचा अपमान होतोय, असं काहीजण म्हणतात, तर काहीजण ‘तू हिंदी का बोलतोस’, ‘तू मराठी आहेस ना मग हिंदीत का बोलतोय’ असं म्हणतात.
यावर सचिन गोस्वामी यांनी आपलं मत मांडत म्हटलं की, “काहीजण हिंदी गाणी का वापरताय असंही म्हणतात. फक्त मराठी गाण्यांवर नाही होऊ शकत. आणि इतर बाकी गाणीही असतात. तुम्हीही घरी ऐकता की हिंदी गाणी. असं कोणी आहे का जो घरी केवळ मराठी गाणी ऐकतो, हिंदी गाणी ऐकतच नाही. असं नाही ना. आपल्याला लताजी का आवडल्या, मोहम्मद रफी का आवडतात. शास्त्रीय संगीताचा अपमान नाही का? असं विचारतात ना, तर मला नाही वाटत की त्यांना गाणी पाठ असतील. यांच्यात कुत्र्याचा शास्त्रीय संगीतात अपमान नाही करत. आता हा शास्त्रीय संगीताचा मान आहे ना की कुत्र्यालाही सुरात गावंस वाटतंय, हा तुमच्या संगीताचा मान नाही का?” असा सवाल त्यांनी ट्रोल करणाऱ्यांना केला आहे.