अॅमेझॉन प्राईम व्हिडीओ या ओटीटी माध्यमाची ओरिजिनल वेब सीरीज ‘द फॅमिली मॅन’ने प्रेक्षकांच्या मनात अशी काही छाप सोडली की, लोक या सीरिजच्या आगामी सीझन्सची अगदी आतुरतेने वाट पाहत असतात. आतापर्यंत या सीरिजचे दोन सीझन्स प्रेक्षकांच्या भेटीला आले असून तिसरा सीझनही लवकरच चाहत्यांच्या भेटीला येणार आहे. त्यामुळे या सीरिजचे अनेक प्रेक्षक या तिसऱ्या सीझनची आतुरतेने वाट पाहत आहेत.
या सीरिजचा पहिला सीझन २०१९ मध्ये आला होता. त्यानंतर २०२१ मध्ये निर्मात्यांनी या सीरिजचा दुसरा सीझन आणला होता. अशातच आता या सीरिजच्या तिसऱ्या सीझनचीही आतुरता लागून राहिली आहे. ‘द फॅमिली मॅन’च्या पहिल्या व दुसऱ्या सीझनला प्रेक्षकांचा चांगला प्रतिसाद मिळाला होता. त्यानंतर दुसऱ्या सीझनच्या अखेरीस तिसऱ्या सीझनबाबत हिंट देण्यात आली होती. त्यामुळे प्रेक्षकांना तिसऱ्या सीझनची उत्सुकता लागली होती.
अशातच आता या सीरिजच्या चाहत्यांसाठी एक खुशखबर आहे. ‘द फॅमिली मॅन’च्या तिसऱ्या सीझनचे चित्रीकरण सुरू झाले असून सोशल मीडियाद्वारे याबद्दलची एक पोस्ट शेअर करण्यात आली आहे. श्रीकांत तिवारी व जे.के. तळपदे आता पुन्हा नव्या मिशनवर असणार आहे. वेब सीरिजमधील भारतीय तपास यंत्रणेचे हे गुप्तहेर कोणत्या मिशनवर असणार याची प्रेक्षकांना उत्सुकता लागली आहे.
‘द फॅमिली मॅन’चा दुसरा सीझन संपल्यापासून वेब सीरिजचा फॅन फॉलोइंग मोठ्या प्रमाणात पाहायला मिळत आहे. आता सीझन ३ सध्या प्रोडक्शनमध्ये आहे. २४० देशांमध्ये ही वेब सीरिज लाँच होणार असून या सीझनमध्ये मनोज बाजपेयी पुन्हा एकदा श्रीकांत तिवारीच्या भूमिकेतून थिरकण्यासाठी सज्ज झाला आहे.
‘द फॅमिली मॅन’च्या दोन्ही सीझनमध्ये वेगवेगळे मुद्दे हाताळण्यात आले होते. पहिल्या भागात काश्मीर, दहशतवादाशी संबंधित मुद्दा होता. तर, दुसऱ्या सीझनमध्ये तामिळनाडू आणि श्रीलंकेतील तामिळ फुटीर चळवळीचा मुद्दा अधोरेखित करण्यात आला होता. त्यामुळे तिसऱ्या सीझनमध्ये नेमके काय असणार याची उत्सुकता प्रेक्षकांना आहे.
