स्टार प्रवाह वाहिनीवरील ‘पुढचं पाऊल’ या मालिकेतून अवघ्या महाराष्ट्रात लोकप्रिय झालेली अभिनेत्री म्हणजे जुई गडकरी. सध्या ती ठरलं तर मग या मालिकेतून प्रेक्षकांच्या भेटीला येत आहे. या मालिकेत ती सायली हे पात्र साकारत असून ईची हीभूमिका अनेकांच्या पसंतीस उतरत आहे, आपल्या अभिनयाने चर्चेत राहणारी ही अभिनेत्री सोशल मीडियावर चांगलीच सक्रिय असते. सोशल मीडियावर तिचं प्रचंड मोठा चाहतावर्गही आहे.
जुई ही गेली अनेक वर्ष टेलिव्हिजनचा लोकप्रिय चेहरा असली तरी तिने खडतर प्रवास करत तिचे आताचे स्थान प्राप्त केलं आहे. जुई याआधी अनेक कारणांनी चर्चेत आली आहे. याआधी तिने अनेकदा तिच्या वैयक्तिक आयुष्याबद्दल भाष्य केलं आहे. अशातच जुईने नुकत्याच ‘कॉकटेल स्टुडिओ’ला दिलेल्या मुलाखतीत तिला एकदा जीवे मारण्याची धमकीही आली होती. याबद्दल सांगितले आहे.
या मुलाखतीत जुईला तुझ्यावर पिस्तूल बाळगण्याची वेळ कशी आली? असा प्रश्न विचारण्यात आला. याचे उत्तर देत जुईने असं म्हटलं की, “२०१४ला माझ्या वाढदिवशी मला जीवे मारण्याची धमकी आली होती. माझ्या कर्जतच्या घरावर काही पत्रं आली होती. ज्यात आम्ही २१ जुलैला जुईला मारुन टाकू होतं असं लिहिलं होतं. पण माझा स्वभाव बघता मी तेव्हा काही घाबरले नव्हते. त्यादरम्यान ठाणे पोलिस स्टेशनचे एसीपी लक्ष्मीनारायण सर यांनी मला तू एक अभिनेत्री आहेस त्यामुळे तुला अनेक ठिकाणी जावं लागतं. तर तू पिस्तूलसाठी अर्ज कर असं सांगितलं. त्यानंतर लगेच पांच दिवसांत मला पिस्तूल मिळालं”.
पुढे ती असं म्हणाली की, “तेव्हा अशी परिस्थिती होती की, माझ्याबरोबर सहा महिने शस्त्र असलेले बॉडीगार्ड्स होते. कारण कधीही काहीही होईल अशी परिस्थिती होती. तर त्यांच्या हातातली शस्त्र मी पाहत होते. मी तेव्हा पिस्तूल वापरण्याच्या सगळ्या पद्धती शिकून घेतल्या. त्या परिस्थितीत मला माझे कुटुंब व प्रसाद मित्राने खूप खंबीर साथ दिली आणि पोलिसांनीही मला ते जवळ बाळगायला सांगितले होते. त्यामुळे मला एक आत्मविश्वास आला पण त्याचबरोबर एक जबाबदारीही आली”.
