दिवंगत बॉलिवूड अभिनेता सुशांत सिंह राजपूतच्या आकस्मिक निधनाने त्याच्या चाहत्यांसह मनोरंजन विश्वालाही मोठा धक्का बसला. सुशांतच्या निधनाला आता चार वर्ष पूर्ण होत आहेत. मात्र त्याच्या आत्महत्येच्या प्रकरणाचा तपास अद्याप अपूर्णच आहे. सुशांतची बहीण श्वेता सिंहने अनेकदा तिच्या भावाच्या आत्महत्येबाबत चौकशीची मागणी केली आहे. तसेच ती अनेकदा सुशांतबद्दलच्या तिच्या आठवणीही शेअर करत असते.
अशातच सुशांतची बहीण श्वेता सिंग कीर्तीने दिवंगत अभिनेत्याच्या चौथ्या पुण्यतिथीनिमित्त एक भावुक पोस्ट शेअर केली आहे. आज सकाळी श्वेताने तिच्या इंस्टाग्राम अकाऊंटद्वारे सुशांत सिंह राजपूतचा एक न पाहिलेला व्हिडिओ पोस्ट केला, ज्यामध्ये तो आपल्या बहिणींबरोबर खास वेळ घालवताना दिसत आहे. या व्हिडीओबरोबरचे तिने भावाच्या न्यायाची मागणीदेखील केली आहे.
या पोस्टमध्ये सुशांत सिंहच्या बहिणीने असं म्हटलं आहे की, “भाई, तू आम्हाला सोडून गेलास याला आज ४ वर्षे पूर्ण झाली आहेत आणि १४ जून २०२०ला नेमकं काय घडलं? ते आम्हाला अजूनही कळलेले नाही. तुझा मृत्यू हे अजूनही एक गूढच आहे. पण मला आता असहाय्य वाटत आहे. मी सत्यासाठी अनेकवेळा अधिकाऱ्यांकडे विनंती केली आहे. पण मी आता माझा संयम गमावत आहे आणि मला आता हार मानावीशी वाटत आहे”.
यापुढे तिने असं म्हटलं आहे की, “शेवटी मला या खटल्यात मदत करू शकणाऱ्या प्रत्येकाच्या हृदयावर हात ठेवून स्वतःला विचारावेसे वाटते की, माझा भाऊ सुशांत सिंहचे नेमके काय झाले? हे जाणून घेण्याची आमची लायकी नाही का? तो एक राजकीय अजेंडा बनला आहे का? त्या दिवशी नेमकं काय घडलं हे सांगण्याइतके सरळ असू शकत नाही का? कृपया, मी विनंती करत आहे की, एक कुटुंब म्हणून पुढे जाण्यास आणि आम्ही ज्यासाठी पात्र आहोत ते जाणून घेण्यात आमची मदत करा”.
आणखी वाचा – उमेश कामतची एकाच वेळी दोन स्वप्नं पूर्ण, पोस्ट शेअर करत सांगितली आनंदाची गोष्ट, म्हणाला, “हाऊसफुल्ल…”
तसेच श्वेताने आणखी एक पोस्ट शेअर केली आहे, ज्यामध्ये तिने असं म्हटलं आहे की, “या क्रूर जगात इतके शुद्ध आणि प्रेमळ असणे ही त्याची चूक होती का? सुशांतवर अन्याय होऊन ४ वर्षे झाली. पण त्याला अजूनही न्याय मिळाला नाही. यासाठी तो खरंच पात्र आहे का?” दरम्यान, १४ जून २०२० रोजी सुशांत सिंह राजपूत त्याच्या मुंबईतील अपार्टमेंटमध्ये मृतावस्थेत आढळला होता. काहींनी हा मृत्यू असल्याचे म्हटले होते तर काहींनी ही आत्महत्या असल्याचा संशय व्यक्त केला. तेव्हापासून त्याची बहीण त्याच्या न्यायासाठी लढत आहे.
