सोनाक्षी सिन्हाच्या प्रियकर झहीर इक्बालबरोबर लग्न होणार असल्याच्या बातम्या सध्या चर्चेत आल्या आहेत. पण असे देखील बोलले जात आहे की, अभिनेत्रीने मुस्लिम मुलाशी लग्न करत असल्याने तिचे वडील शत्रुघ्न सिन्हा व भाऊ लव सिन्हा खूश नाहीत. सोनाक्षी सिन्हा या महिन्यात तिचा बॉयफ्रेंड झहीर इक्बालसह लग्न करणार आहे. ‘हीरामंडी’ फेम या कलाकारांच्या लग्नात अनेक बॉलिवूड सेलिब्रिटी उपस्थित राहू शकतात, असे सांगितले जात आहे. अभिनेत्रीने तिच्या हीरामंडीच्या सहकलाकारांना लग्नाचे आमंत्रणही पाठवले आहे. सध्या सर्वत्र सोनाक्षी व झहीरच्या लग्नाची चर्चा होत आहे. या सगळ्यादरम्यान सोनाक्षीच्या घरच्यांकडूनही तिच्या लग्नाबाबत प्रतिक्रिया येऊ लागल्या आहेत. (Sonakshi Sinha Wedding)
सोनाक्षीच्या लग्नाबाबत तिचे वडील शत्रुघ्न सिन्हा यांनी सांगितले आहे की, त्यांना त्यांच्या मुलीच्या लग्नाची कोणतीही बातमी कळालेली नाही. ‘झूम’बरोबरच्या खास संवादात शत्रुघ्न सिन्हा म्हणाले आहेत की, “मी दिल्लीत आहे. निवडणुकीच्या निकालानंतर मी येथे आहे. मी अजून माझ्या मुलीच्या योजनांबद्दल बोललो नाही. तुमचा काय प्रश्न आहे की ती लग्न करत आहे?, तर तिने मला अजून काही सांगितले नाही, असे उत्तर त्यांनी दिले आहे. जेव्हा ती माझ्याशी याबद्दल बोलेल तेव्हा माझे आशीर्वाद तिच्या पाठीशी असतील. तिला जगातील सर्व सुख मिळावे अशी आमची इच्छा आहे”.
शुत्रघ्न सिन्हा पुढे म्हणाले की, “लोक मला लग्नाबद्दल प्रश्न विचारत आहेत. तुम्हाला याबद्दल काहीच माहिती नाही आणि मीडियाला सर्व काही माहित आहे”. यावर मी एवढेच सांगू इच्छितो की, “आजकालची मुलं त्यांच्या पालकांना विचारत नाहीत. ते फक्त येऊन सांगतात. आणि आम्ही सांगितले जाण्याची वाट पाहत आहोत”. वडील शत्रुघ्न सिन्हा पाठोपाठ सोनाक्षीचा भाऊ लव सिन्हा यालाही बहिणीच्या लग्नाबद्दल माहिती नाही. सोनाक्षीच्या लग्नाबाबत लव पुढे म्हणाला की, “या प्रकरणात माझा कोणताही सहभाग नाही”.
भाऊ आणि वडिलांच्या या वक्तव्यानंतर लोकांना वाटते की, सोनाक्षीचे कुटुंब मुस्लिम मुलाशी लग्न करण्याच्या निर्णयावर खूश नाही आहेत. लोकांना वाटत आहे की, सोनाक्षीने तिच्या घरच्यांच्या इच्छेविरुद्ध लग्न करण्याचा विचार केला आहे. कारण आतापर्यंत सोनाक्षीच्या कुटुंबीयांकडून असे कोणतेही विधान आलेले नाही, ज्यावरुन तिचे कुटुंब तिच्या लग्नावर आनंदी असल्याचे दिसत आहे. या सगळ्यादरम्यान सोनाक्षी व झहीर लिव्ह-इन रिलेशनशिपमध्ये राहत असल्याच्या बातम्या येत होत्या. गेल्या वर्षी, अभिनेत्रीने एक नवीन अपार्टमेंटदेखील खरेदी केले होते. त्यानंतर तिच्या एकत्र राहण्याच्या बातम्या खऱ्या मानल्या गेल्या होत्या. सोनाक्षी व झहीरची पहिली भेट सलमान खानने आयोजित केलेल्या पार्टीत झाली होती.
