छोट्या पडद्यावर सध्या वेगवेगळ्या विषयांवर नव्या मालिका प्रदर्शित होताना दिसत आहेत. त्यामधील काही मालिका टीआरपीच्या शर्यतीत अव्वल स्थान पटकावताना दिसत आहेत. अशातच एका आगळी वेगळी लव्हस्टोरी घेऊन ‘शिवा’ ही मालिका ‘झी मराठी’ वाहिनीवर प्रदर्शित होत आहे. या मालिकेने अल्पावधीतच प्रेक्षकांची मन जिंकली. या मालिकेत भिनेता शाल्व खिंजवडेकर महत्त्वाच्या भूमिकेत पाहायला मिळत आहे. तर अभिनेत्री पुर्वा फडके ही शिवा या मुख्य भूमिकेत पाहायला मिळत आहे. (Purva Phadke On Shiva)
शाल्व व पुर्वा यांच्यावर प्रेक्षकही भरभरून प्रेम करताना दिसत आहेत. कलाकार मंडळी त्यांची भूमिका साकारण्यासाठी नेहमीच विशेष मेहनत घेत असतात. बरेचदा भूमिकेसाठी वजन कमी-जास्त करणे हे सुरुच असतं. पण शक्यतो भूमिकेसाठी केस कापले असे शब्द फार कमी कलाकारांच्या बाबतीत कानावर येतात. अशीच भूमिकेसाठी शिवा या मालिकेतील पुर्वा हिने विशेष मेहनत घेतली असल्याचं पाहायला मिळतंय. शिवा या भूमिकेसाठी तिने बॉब कट केला आहे. याबाबत पुर्वाने नुकत्याच दिलेल्या ‘इट्स मज्जा’ या चॅनलला दिलेल्या मुलाखतीत पहिल्यांदाच भाष्य केलं आहे.
याबाबत बोलताना पुर्वा म्हणाली, “हो. मी या भूमिकेसाठी खरंच केस कापले आहेत. आणि हा लूक मला चांगला वाटतोय. माझ्या दोन्ही सासूबाईंचा बॉब कट आहे. त्यामुळे मी जेव्हा केस कापून त्यांच्यासमोर गेले तेव्हा त्या म्हणाल्या अगं खूप छान दिसतंय. माझा नवरा अमोघ पण बोलला तू अशी राहू शकतेस, ही हेअरस्टाईल तुला छान दिसतेय. त्याने माझ्या सासूला बॉब कटमध्ये पाहिलं आहे त्यामुळे त्याला नवल असं काही वाटलं नाही. सुरुवातीला थोडं बघताना त्यालाही धक्का बसला असेल, मात्र तो मला बोलला की तुला या नव्या हेअरस्टाईलमध्ये बघायची हळूहळू सवय होईल”.
पुढे पुर्वा म्हणाली, “मला दर सहा महिन्यांनीही लूक बदलायला फार आवडतो. हा लूक मी पहिल्यांदा केला आहे. आणि मला स्वतःला हे खूप आवडलं आहे. सेटवर मी विग लावते. पण बाहेर जाताना केस कसे नीट राहतील आणि मी नीट दिसेन याकडे माझं जास्त लक्ष असतं. मी पूर्णतः मुलासारखे केस कापले आहेत. ही भूमिका अगदी माझ्याशी मिळतीजुळती आहे. काम करायला मला खूप मज्जा येत आहे. मी १५ ते २० मिनिटात शिवा या भूमिकेसाठी तयार होते”.
