बॉलिवूडचा किंग खान शाहरुख खानसाठी २०२३ हे वर्ष त्याच्या कारकिर्दीतील लकी वर्ष ठरलं, असं म्हणणं वावगं ठरणार नाही. त्याच्या या वर्षाची सुरुवात त्याच्या ब्लॉकबस्टर चित्रपट ‘पठाण’ने झाली आणि त्यानंतर ‘जवान’ने बॉक्स ऑफिसवर बक्कळ कमाई करत बॉलिवूड चित्रपटांना मागे टाकले. आता पुढच्या ‘डिंकी’ या चित्रपटाबाबतही सिनेसृष्टीत अशाच अपेक्षा व्यक्त केल्या जात आहेत. यानंतर समोर आलेल्या शाहरुखच्या आणखी एका बातमीने चाहत्यांना सुखद धक्का मिळाला आहे. शाहरुख त्याच्या लेकीसह म्हणजेच सुहानाबरोबर चित्रपटात झळकणार असल्याचं समोर आलं आहे. (Shahrukh Khan And Suhana Khan New Movie)
सुहानाचा हा चित्रपटात मोठ्या पडद्यावरील पदार्पण असणार आहे. याशिवाय सुहाना नेटफ्लिक्सच्या ‘द आर्चीज’ या शोमधून ओटीटीवरील चित्रपटांमध्ये प्रवेश करणार आहे. वडील व मुलीच्या या हटके जोडीचा हा पुढचा चित्रपट ऍक्शनपॅक्ड थ्रिलर असणार असल्याचे बोलण्यात येत आहे. यानंतर बापलेकीच्या या नव्या चित्रपटाचे नावही समोर आले आहे.
नुकत्याच आलेल्या वृत्तानुसार, शाहरुख व सुहानाच्या या चित्रपटाचे नाव ‘किंग’ असणार असल्याचं समोर आलं आहे. ‘पिंकविला’च्या रिपोर्टनुसार, या चित्रपटाचे चित्रीकरण पुढील वर्षी म्हणजेच जानेवारीमध्ये सुरू होणार आहे. हा एक ऍक्शनपट असल्याचंही बोललं जात आहे. त्यामुळे पहिल्यांदाच मोठ्या पडद्यावर बापलेकीची जोडी पाहणं रंजक ठरणार आहे. तसेच जानेवारीपासून चित्रपटाचं चित्रीकरण कोणताही ब्रेक न घेता पूर्ण केलं जाणार असल्याचेही सांगण्यात येत आहे. तसेच हा चित्रपट अॅक्शन थ्रिलर असला तरी हा चित्रपट शाहरुखच्या ‘पठाण’ आणि ‘जवान’पेक्षा खूपच वेगळा असेल, असंही बोललं जात आहे.
शाहरुख व सुहाना यांच्या या चित्रपटात भरपूर ऍक्शन सीन्स असले तरी चित्रपटाचे कथानक हे भावनिक मुद्द्यांवर भाष्य करणारे असणार आहे. सध्या शाहरुख खान २२ डिसेंबरला प्रदर्शित होणाऱ्या त्याच्या आगामी डंकी या चित्रपटाच्या प्रदर्शनाच्या तयारीत आहे. या चित्रपटात शाहरुखशिवाय तापसी पन्नू, विकी कौशल व बोमन इराणी हे कलाकार देखील दिसणार आहेत.