Suprit Kadam urges to use helmet : मुंबईतील भीषण रस्त्यांबाबत अनेक कलाकार मंडळी नेहमीच आवाज उठवतात. रस्त्यावरील खड्डे, मोठ्या प्रमाणात होणार ट्राफिक आणि रस्त्यांच्या वाईट परिस्थितीमुळे होणारे अपघात यावर आजवर अनेकदा आवाज उठविला. अशातच आता रस्त्याच्या भीषण परिस्थितीमुळे एका कलाकाराचा अपघात झाला असल्याचं समोर आलं आहे. अभिनेत्याने मार लागल्याचा फोटो शेअर करत सोशल मीडियावर पोस्ट शेअर केली. हा अभिनेता म्हणजे सुप्रित कदम. सुप्रित सध्या ‘सावल्याची जणू सावली’ मालिकेत महत्त्वपूर्ण भूमिका साकारताना दिसत आहे. मात्र आता अभिनेता त्याच्या सोशल मीडियावरील पोस्टमुळे चर्चेत आला आहे.
सुप्रितने त्याचा अपघात झाला असल्याची पोस्ट शेअर केल्याने साऱ्यांच्या नजरा त्याच्याकडे लागून राहिल्या आहेत. सुप्रितने शेअर केलेल्या या पोस्टमध्ये त्याच्या हाताला जखमा झाला असल्याचं दिसत आहे. ही पोस्ट शेअर करत त्याने लिहिलं आहे की, “फोटो टाकण्यामागे कारण असं आहे की बांद्रा कार्टर रोडवर ७ फेब्रुवारी २०२६ ला संध्याकाळी ७ वाजता माझा अपघात झाला. रस्त्यावरच्या लाइट्स गेलेल्या आणि एक काळ्या रंगाचा कुत्रा रोड क्रॉस करता करता माझ्या बाईक खाली आला”.
आणखी वाचा – ‘कमळी’ मालिकेत मोठा ट्विस्ट, कामिनीला महाजनांनी काढलं घराबाहेर, म्हणाली, “कामिनी आजी घराबाहेर निघा…”
पुढे तो म्हणाला, “सांगायचा मुद्दा असा की एक्सीडेंट मोठा झाला पण मी थोडक्यात बचावलो. माझ्या हेल्मेटमुळे. आपण किती गाडी सेफ चालवत असलो तरी समोरच्या कुठल्याही गोष्टीमुळे असे प्रसंग कधीही येऊ शकतात. हेल्मेटमुळे आपला जीव वाचू शकतो . कृपया करुन हेल्मेट कंपल्सरी वापरा. धन्यवाद”. सुप्रितची ही पोस्ट सध्या सोशल मीडियावर व्हायरल झाली असून नेटकरी कमेंट करत काळजी व्यक्त करत आहेत.
सुप्रितच्या या पोस्टवर अनेकांनी कमेंट केल्या आहेत. यांत सावळ्याची जणू सावली मालिकेतील मुख्य पात्र अभिनेत्री प्राप्ती रेडकरने कमेंट करत “इतकं लागलं असूनही तू १४ तास शूट करत आहेस. तुला सलाम”, असं म्हटलं आहे. यावर सुप्रितने कमेंट करत “जेव्हा तुम्हाला तुमचं काम आवडत असतं तेव्हा ते काम सुरु राहिलं पाहिजे”, असं म्हटलं.
