सिनेसृष्टीत असे अनेक कलाकार आहेत ज्यांच्या मैत्रीची उदाहरणे आजही दिली जातात. यांत बोलायचं झाल्यास अभिनेते संजय मोने व आनंद इंगळे यांच्या मैत्रीबद्दल बोलणं वावगं ठरणार नाही. आनंद इंगळे यांना मुंबईत आल्यावर घरात राहायला जागा देण्यापर्यंतची त्यांची घनिष्ठ मैत्री आहे हे फार कमी जणांना ठाऊक असेल. संजय मोने व आनंद इंगळे यांनी दोन स्पेशल या कार्यक्रमात हजेरी लावली होती. त्यावेळी त्यांच्यातील या मैत्रीचं खरं रूप समोर आलं. आनंद इंगळे व संजय मोने यांच्यात रंगलेल्या गप्पा फारच रंजक होत्या. आनंद इंगळे यांना जेव्हा सुकन्या मोने यांच्याबद्दल विचारलं तेव्हा आनंद इंगळे यांनी सांगितलेला किस्सा ऐकून सुकन्या मोने यांचं नव्याने कौतुक करावंसं वाटेल. पडद्यावर एक अभिनेत्री म्हणून त्यांचा अभिनय पाहताना त्यांची हुशारी, त्यांचा जबाबदारपणा कळतो तितकाच त्यांचा खरेपणा हा त्यांच्या रोजच्या जीवनातही आहे. (Anand Ingale On Sanjay Mone)
दोन स्पेशल या कार्यक्रमात, संजय मोने म्हणजे बेभान, वादळी व्यक्तिमत्व या व्यक्तिमत्वाचा सांभाळ करताना सुकन्या मोने यांची काय तारांबळ उडते असा प्रश्न विचारला असता यावर आनंद इंगळे यांनी एक किस्सा सांगितला. खरंच हा किस्सा ऐकून सुकन्या मोने यांचं करावं तितकं कौतुक कमीच म्हणावं लागेल. आनंद इंगळे म्हणाले, “संजय व सुकन्यामध्ये सुकन्या जास्त काळजी घेणारी आहे. आणि खूप खमकीही आहे. सुकण्याच्या या स्वभावामुळे आजवर संजयने बऱ्याच गोष्टी निभावून नेल्या आहेत”. यावर मान डोलावत संजय मोने यांनी, “शंभर टक्के” असंही म्हटलं.
यापुढे बोलताना आनंद इंगळे म्हणाले की, “संजयची लग्नानंतर पहिल्या वर्षी बायपास झाली. म्हणजे संजयच्या लग्नाच्या पहिल्या वाढदिवशी संजय रुग्णालयात होता, आणि सुकन्या त्याच्याजवळ होती. या सगळ्या प्रकारात, या सगळ्या आलेल्या संकटात संजयला ज्याप्रकारे सुकन्याने संभाळलंय याचं कौतुक व्हायलाच हवं. असं नाही आहे की त्यांच्यात वाद होत नाहीत, त्यांची भांडण होत नाहीत, तेवढंच त्यांचं एकमेकांवर प्रेमही आहे. संजयसमोर मी आज असंही बोलेन की, संजयसोबत एकत्र राहायचं काकणभर जास्त गुण हे सुकन्याला जातात”.
यावर बोलताना संजय मोने म्हणाले की, “मी समाजात कसं वावरायचं हे सगळं काही सुकन्या बघते. अगदी माझ्या घरचे नातेवाईक ते कोण आहेत, काय आहेत हेदेखील मला सुकन्याकडून कळतं”, असं म्हणत संजय यांनी सुकन्या यांचं कौतुक केलं.
