Rajshri Deshpande Breast Cancer : मराठी सिनेविश्वातील एका लोकप्रिय अभिनेत्रीबाबत मोठी बातमी समोर आली आहे. अभिनेत्रीने स्वतःच सोशल मीडियावर पोस्ट करत कॅन्सर झाल्याचे सांगितले आहे. ‘ब्लॅक वॉरंट’, ‘सिक्रेड गेम्स’ मधील दमदार भूमिकांसाठी ओळखल्या जाणाऱ्या अभिनेत्री राजश्री देशपांडे कर्करोगाशी सामना करत आहे. राजश्रीला ग्रेड १ च्या स्तनाच्या कर्करोगाचे निदान झाले असून तिच्यावर शस्त्रक्रिया करण्यात आली. राजश्रीने इंस्टाग्राम अकाउंटवर एक पोस्ट शेअर केली आहे. ज्यात तिने कॅन्सरवरील शस्त्रक्रिया आणि उपचाराबाबत माहिती दिली आहे. थेट हॉस्पिटलमधील फोटो शेअर करत तिने कॅन्सर आजाराची माहिती दिली.
राजश्रीने इंस्टाग्राम पोस्ट शेअर करत त्याखाली कॅप्शन देत असं म्हटलं की, “सुदैवाने, नियमित तपासणीदरम्यान हा आजार सुरुवातीच्या टप्प्यातच लक्षात आला, त्यामुळे मला लढण्याची संधी मिळाली. निदनानंतर अनेक चाचण्या आणि शस्त्रक्रियांचा प्रवास एखाद्या रोलरकोस्टर राईडसारखा होता. पण तुम्हा सर्वांच्या प्रेमामुळे मी यातून बाहेर पडू शकले. शस्त्रक्रियेनंतर माझ्या आई आणि बाबांचे चेहरे पाहून माझ्या मनातली भीती नाहीशी झाली आणि मला ताकद मिळाली. सर्वांच्या पाठिंब्यामुळे आता मी पुन्हा एकदा जग जिंकायला तयार आहे”.
पुढे तिने म्हटलं, “आता मी खूप चांगल्या प्रकारे रिकव्हर होत आहे आणि लवकरच हॉस्पिटलमधून घरी जाणार आहे. तुमचे प्रेम हेच माझे सर्वात मोठे औषध आहे”, असं म्हणत राजश्री देशपांडेने कोकिलाबेन हॉस्पिटलमधील डॉक्टरांचे आभार मानले. ही पोस्ट शेअर करत राजश्रीने असंही म्हटलं की, “हे वाचत आहात याचा अर्थ असा की, मला माझ्या आई-वडिलांना हे सांगण्याचं धाडस मिळालंय की मला ‘इनफिल्ट्रेटिंग डक्टल कार्सिनोमा’ म्हणजेच ग्रेड १ ब्रेस्ट कॅन्सरचे निदान झाले आहे”.
