Rashmika and vijay Wedding Date : दाक्षिणात्य सिनेसृष्टीतील लोकप्रिय जोडी म्हणून ओळखले जाणारे अभिनेत्री रश्मिका मंदाना आणि अभिनेता विजय देवरकोंडा लवकरच वैवाहिक आयुष्यात पदार्पण करणार असल्याची जोरदार चर्चा सध्या सुरु आहे. गेल्या काही काळापासून दोघांच्या नात्याबाबत विविध तर्कवितर्क लावले जात होते. मात्र आता त्यांच्या लग्नासंदर्भात महत्त्वाची माहिती समोर आली आहे.
मिळालेल्या माहितीनुसार, ऑक्टोबर महिन्यात हैदराबाद येथे विजय देवरकोंडाच्या घरी रश्मिका आणि विजय यांचा साखरपुडा पार पडला होता. हा साखरपुडा अत्यंत खासगी पद्धतीने, फक्त जवळच्या मित्रमंडळी आणि कुटुंबीयांच्या उपस्थितीत पार पडल्याचं सांगितलं जात आहे. विशेष म्हणजे, या साखरपुड्याचे फोटो दोघांनीही अद्याप सोशल मीडियावर शेअर केलेले नाहीत. मात्र सार्वजनिक कार्यक्रमांदरम्यान दोघांच्या हातातील अंगठ्या पाहून चाहत्यांनी साखरपुड्याचा अंदाज बांधला होता.
यापूर्वी विजय देवरकोंडाच्या टीमने माध्यमांना माहिती दिली होती की, रश्मिका आणि विजय यांचा साखरपुडा झाला असून ते २०२६ मध्ये लग्न करण्याच्या तयारीत आहेत. आता याच संबधित आणखी एक महत्त्वाची माहिती समोर आली आहे. माहितीनुसार, दोघे येत्या नवीन वर्षात विवाहबंधनात अडकणार आहेत.
‘हिंदुस्तान टाइम्स’ने दिलेल्या वृत्तानुसार, विजय देवरकोंडा आणि रश्मिका मंदाना यांचं लग्न २६ फेब्रुवारी रोजी राजस्थानमधील उदयपूर येथे पार पडणार आहे. या खास सोहळ्यासाठी त्यांनी उदयपूरमधील एका भव्य आणि ऐतिहासिक राजवाड्याची (हेरिटेज प्रॉपर्टी) निवड केली आहे. साखरपुड्याप्रमाणेच लग्नसोहळाही अतिशय खासगी ठेवण्याचा त्यांचा विचार असून, या कार्यक्रमाला फक्त कुटुंबातील सदस्य आणि अतिशय जवळचे मित्र उपस्थित राहणार असल्याचं सांगितलं जात आहे. महत्त्वाचं म्हणजे, रश्मिका आणि विजय यांनी अद्याप त्यांच्या नात्याबाबत कोणतीही अधिकृत घोषणा केलेली नाही. तरीसुद्धा, सातत्याने समोर येणाऱ्या माहितीमुळे आणि सूत्रांकडून मिळालेल्या अपडेट्समुळे त्यांच्या चाहत्यांमध्ये प्रचंड उत्सुकता पाहायला मिळत आहे.
