सोशल मीडियावर अनेक कलाकार मंडळी आपल्या आवडत्या कलाकारांबरोबरची धमाल, मजामस्ती शेअर करत असतात. सोशल मीडियावरील कलाकारांची ही धमाल मजामस्ती चाहत्यांनादेखील तितकीच आवडते. काही दिवसांपूर्वी नम्रता संभेरावने सहकलाकार व तिचा मित्र प्रसाद खांडेकरबरोबर मजामस्तीचा एक व्हिडीओ शेअर केला होता. यामध्ये प्रसाद झोपेत पेंगतानाचे पाहायला मिळाले होते. नम्रताने हा व्हिडीओ शूट करून सोशल मीडियाद्वारे शेअर केला होता.
या व्हिडीओमध्ये प्रसाद पेंगताना दिसत होता. “सॉरी, कँट्रोल नाही झालं पश्या. हा ऑडिओ खूप ट्रेंडमध्ये आहे, म्हणून मी ही पोस्ट करत आहे (btw हा व्हिडिओ jet lag मधला होता. आम्ही ऑस्ट्रेलियात होतो, तेव्हाचा आहे) बाकी पश्याला आळस येत नाही, तो खूप उत्साही आहे. माझं काही खरं नाही” असं लिहित नम्रताने प्रसादचा हा गंमतीदार व्हिडीओ शेअर केला होता. या व्हिडीओवर प्रसादने “रुको नम्रता. “इसका करारा जवाब मिलेगा. सबका बदला लैगा रे पश्या” अशी प्रतिक्रिया दिली होती.
आणि अखेर प्रसादने त्याचा हा बदला घेतलेला आहे. प्रसादनेही नम्रता झोपलेली असतानाचा व्हिडीओ शेअर केला आहे. या व्हिडीओमध्ये त्याने असं म्हटलं आहे की, “काही दिवसांपूर्वी नम्रताने माझा एक व्हिडीओ शेअर केला होता. आता तुम्हीदेखील तिला झोपताना बघा. किती क्यूट दिसते बघा. हा आळस नसून प्रमोशनसाठी सध्या धावपळ सुरू आहे. आता मी एका वेगळ्या प्रकारे तिला झोपेतून जागा करतो आहे.”
त्यानंतर प्रसाद ‘नाच गं घुमा’ हे गाणं लावतो. हे गाणं ऐकून नम्रता दचकून झोपेतून उठते. सुरुवातीला ती थोडी घाबरते, पण नंतर ‘नाच गं घुमा’ची हूक स्टेप करतानाचे पाहायला मिळत आहे. दरम्यान, या व्हिडीओखाली मुक्ता बर्वे, स्वप्नील जोशी, स्वतः नम्रता संभेराव, भक्ती रत्नपारखी या कलाकारांसह चाहते मंडळींनीही आपल्या प्रतिक्रिया दिल्या आहेत.
