सिनेसृष्टीत लगीनघाई सुरु असून एकामागोमाग एक कलाकार मंडळी लग्नबंधनात अडकत आहेत. अभिनेता प्रथमेश परब क्षितीजा घोसाळकरसह लग्नबंधनात अडकला. तर अभिनेत्री तितीक्षा तावडे व सिद्धार्थ बोडकेचाही शाही विवाहसोहळा संपन्न झाला. यापाठोपाठ आता प्रेक्षकांची लाडकी अभिनेत्री पूजा सावंतही लग्नबंधनात अडकणार आहे. पूजा सावंतच्या घरीही लगीनघाई सुरु झालेली पाहायला मिळत आहे. पूजाच्या लग्नापुर्वीच्या विधींचे अनेक फोटो, व्हिडीओ समोर आले आहेत. (Pooja Sawant Siddhesh Chavan Haladi Ceremony)
अशातच पूजाचा अगदी थाटामाटात हळदी समारंभ पार पडला. पूजाच्या हळदीला साऱ्यांनी धमाल, मस्ती केलेली पाहायला मिळाली. हळद लावताना पूजाला अश्रूही अनावर झालेले पाहायला मिळाले. मॉडर्न पेहरावात जरी हा हळदी समारंभ पार पडला असला तरी या कार्यक्रमाला पारंपरिक टच मिळाला. हळदी समारंभात गायली जाणारी गाणी पूजाच्या हळदीला ऐकायला मिळाली. जवळचे नातेवाईक, कुटुंबीय व मित्र परिवाराच्या उपस्थितीत पूजाचा हळदी समारंभ संपन्न झाला.
पूजाच्या हळदी समारंभातील डान्सचा व्हिडीओ सध्या तुफान व्हायरल होत आहे. पूजाला लहानपणापासून नृत्याची आवड आहे. पूजाने स्वतःच्या हळदीमध्ये ‘बुमरो बुमरो’ या गाण्यावर ठेका धरलेला पाहायला मिळाला. पूजा या गाण्यावर डान्स करत असताना तिचा मित्र-परिवार अवतीभवती गोल करुन बसत तिला साथ देताना दिसला. तर पूजाच्या हळदीतील आणखी एका व्हिडीओने साऱ्यांचं लक्ष वेधून घेतलं आहे. या व्हिडीओत पूजा तिची लाडकी बहीण रुचिरासह ठेका धरताना दिसत आहे.
दोघी बहिणीचं एकमेकींवर भरपूर प्रेम आहे. पूजाला हळद लावतानाही तिच्या बहिणीला अश्रू अनावर झाले. पूजा व सिद्देशचा हळदी समारंभातील लूकही चर्चेत आला आहे. हळदी समारंभासाठी दोघांनी पिवळा रंग न निवडता जांभळ्या रंगाच्या पेहरावाची निवड केली होती. पूजाने यावेळी लेहेंगा-चोळी परिधान केली होती तर सिद्धेश जांभळ्या रंगाच्या कुर्ता पायजमामध्ये पाहायला मिळाला. तर पूजाच्या हातातील हिरवा चुडा आणि केसात माळलेल्या पांढऱ्या रंगाच्या गजऱ्याने तिचं सौंदर्य आणखीनच फुलून आलं होतं.