२०१३ साली प्रदर्शित झालेल्या ‘शुद्ध देशी रोमान्स’ या चित्रपटाने तरुण प्रेक्षक वर्गाला वेड लावलं होतं. दिग्दर्शक मनीष शर्मा दिग्दर्शित या चित्रपटाने बॉक्स ऑफिसवरही बक्कळ कमाई केली होती. या चित्रपटाच्या माध्यमातून परिणीती चोप्रा व सुशांत सिंग राजपुतची जोडी पहिल्यांदाच मोठ्या पडद्यावर झळकली होती. नुकतीच या चित्रपटाला १० वर्ष पूर्ण झाली आहे. त्यानिमित्त परिणीती चोप्राने केलेली एक खास पोस्ट साऱ्यांचं लक्ष वेधून घेतेय. (Parineeti Chopra On Sushant Sing Rajput)
सुशांत सिंग राजपुत आज आपल्यात नाही. पण त्याची प्रत्येक वेळी आठवण आल्यावाचून काही राहत नाही. सुशांत सिंग राजपुतचा स्वतःचा असा खूप मोठा चाहतावर्ग आहे. आज जरी तो आपल्यात नसला तरी त्याचा चाहत्यांच्या मनात त्याच स्थान हे कायम आहे. शिवाय त्याच्यासोबत काम केलेले कलाकार ही सुशांतला विसरू शकत नाही आहेत. अशातच सुशांत सिंग राजपुत व परिणीती चोप्रा यांच्या’ शुद्ध देशी रोमान्स’ या चित्रपटाला प्रदर्शित होऊन १० वर्ष पूर्ण झाली आहेत. यानिमित्त परिणितीने सुशांतच्या आठवणीत एक व्हिडीओ शेअर केला आहे.
परिणीतीने आपल्या इन्स्टाग्रामवर ‘शुद्ध देसी रोमान्स’ चित्रपटातील काही सीन्सचा बीटीएस व्हिडीओ पोस्ट केला आहे. हा व्हिडीओ पोस्ट करत तिने लिहिलं आहे की, “वेळ किती लवकर निघून जाते. ‘शुद्ध देसी रोमान्स’ला १० वर्ष पूर्ण झाली. मज्जा, बिझी शूट पण हळव्या क्षणांनी सिनेमाच्या आठवणी भरलेल्या आहेत. दिग्गज कलाकारांसोबत काम करण्याचा अनुभव छानच होता. ऋषी सर आम्ही तुम्हाला मिस करतो. सुशांत तुझी तर खूपच जास्त आठवण येते. माझ्या आवडत्या अभिनेत्यांपैकी तू एक होतास.’
परिणीतीच्या या व्हिडीओखली अनेकांनी कमेंट करत सुशांतला मिस करत असल्याचं म्हटलं आहे. “सुशांत तुझी खरंच खूप आठवण येते,’या सिनेमाचं एक वेगळंच आकर्षण होतं” असं एका युजरने म्हटलं आहे. तर आणखी एकाने “सुशांत खूप आठवतो’ अशी कमेंट केली आहे.