Viral Video : सध्या देशभरात भारत-पाकिस्तान युद्धजन्य परिस्थितीचा माहोल असताना आपण आपल्या घरात कुटुंबासह सुखाची झोप घेत आहोत त्याचे एकमेव कारण म्हणजे भारतीय सैनिक. प्रत्येक जवान जीवाचे रान करुन भारताच्या सीमेवर लढा देत आहे. या जवानांच्या कुटुंबियांना मात्र झोप लागत नसावी. आपला माणूस सीमेवर अहोरात्र डोळ्यात तेल घालून शत्रूपासून आपले रक्षण करतोय हा विचार सतत मनात येत असावा. हो. आणि याचा अभिमान जरी असला तरी काळजीपोटी जीव हा तुटतोच. आताचा गरम माहोल पाहता काही दिवसांपूर्वी सुट्ट्यांसाठी घरी परतलेल्या या फौजींना कामावर रुजू होण्याचे आदेश आले.
भारत-पाकिस्तानमधील वाढत्या तणावाच्या पार्श्वभूमीवर भारतीय लष्करातील सर्व जवानांच्या सुट्ट्या रद्द करण्यात आल्या आणि तात्काळ सर्वांना कामावर रुजू होण्याचे आदेश देण्यात आले. अशातच सोशल मीडियावर एका जवानाचा एक व्हिडीओ तुफान व्हायरल होत आहे. यामध्ये सुट्टी रद्द होताच हा जवान कसलाही विचार न करता कामावर परतण्यास सज्ज झाला आहे. किती काही असलं तरी मनावर दगड ठेवून या जवानाला त्याच्या बायको-मुलापासून, आईपासून दूर जावं लागणार असल्याचं दुःख चेहऱ्यावर उमटू न देता देशसेवेचा आनंद ओसंडून वाहताना दिसला.
आणखी वाचा – “देशात काय चाललंय भान ठेवा”, नारकर कपलच्या डान्सवर नेटकऱ्याची कमेंट, ऐश्वर्या म्हणाल्या, “तुम्ही भारतीय ना…”
प्रकाश दर्गुडे या इंस्टाग्राम अकाऊंटवरून व्हायरल झालेला हा व्हिडीओ, “भारत पाकिस्तान सीमेवर माहोल गरम असताना फौजीच्या सुट्ट्या रद्द करुन परत बोलावून घेतले”, असं कॅप्शन देत शेअर केला आहे. दोन व्हिडीओ त्यांनी यावेळी पोस्ट केले आहेत. यांत एका व्हिडीओमध्ये, तो फौजी बॅग पॅक करुन सोफ्यावर बसला आहे आणि त्याची आई त्याचे औक्षण करताना दिसत आहे. आपल्या जीवापलीकडे असणाऱ्या तिच्या या लेकराला देशाचे रक्षण करायला जाताना ती सकारात्मक ऊर्जा देताना दिसली.
तर दुसरा व्हिडीओ, काळजाला चीर पाडणारा होता. एकीकडे आई मुलाला काळजावर दगड ठेवून सीमेवर लढायला पाठवत होती तर दुसरीकडे त्याच्या फौजीचा चिमुकला मुलगा (रुद्रांक्ष) हा वडिलांना कुठेही जाऊ नका, इथेच राहा, अशी विनवणी करताना दिसला. “पप्पा तुम्ही जाऊ नका ना”, असं म्हणत तो वडिलांना विनवणी करत आहे. तर “जावं लागेल बेटा”, असं म्हणत तो फौजी लेकाची समजूत काढताना दिसत आहे. सध्या या फौजीचा मनाला चटका लावणारा व्हिडीओ सोशल मीडियावर तुफान व्हायरल होत आहे. अनेकांनी या व्हिडीओला पसंती दर्शवलेली पाहायला मिळत आहे.
