मराठी चित्रपटसृष्टीत गेल्या काही वर्षांपासून विविध विषयांवर आधारित अनेक दर्जेदार चित्रपट येत आहे. पूर्वी केवळ कौटुंबिक आणि विनोदी चित्रपटपुरती ओळखली जाणारी ही चित्रपटसृष्टी आता कात टाकताना दिसते. सामाजिक, ऐतिहासिक चित्रपटांबरोबर आता रहस्यमय चित्रपटसुद्धा मराठीमध्ये येत आहे. अशातच एक नवा रहस्यमय चित्रपट लवकरच प्रेक्षकांच्या भेटीला येत आहे. ‘रावसाहेब’ असं या चित्रपटाचं नाव असून नुकतंच याचा टीझर समोर आला आहे. (Raavsaheb Movie Teaser)
‘रावसाहेब’ चित्रपटाच्या निमित्ताने अभिनेत्री मुक्त बर्वे व सोनाली कुलकर्णी प्रथमच एकत्र स्क्रीन शेअर करताना दिसणार आहे. त्याचबरोबर जितेंद्र जोशी, मृण्मयी देशपांडे, रश्मी अगडेकर हेसुद्धा चित्रपटात महत्वाची भूमिका साकारणार आहे. टीझरची सुरुवात एका घनदाट जंगलाने होते. ज्यामध्ये हे कलाकार अत्यंत भयभीत अवस्थेत दिसत आहे. तगडी स्टारकास्ट आणि टीझरमध्ये दिसणाऱ्या रहस्यमय गोष्टीवरून ‘रावसाहेब’बद्दल प्रेक्षकांना मोठी उत्सुकता लागली आहे. राष्ट्रीय पुरस्कारप्राप्त दिग्दर्शक निखिल महाजन यांनी या चित्रपटाचे दिग्दर्शन केलं आहे. तर प्राजक्त देशमुख, श्रीपाद देशपांडे, निखिल महाजन आणि जिजीविशा काळे लिखित या चित्रपटाची निर्मिती अक्षय बर्दापूरकर, संदीप बासू, सेहेर बेदी, सुनील जैन, स्वप्नील भंगाळे, निखिल महाजन आणि नेहा पेंडसे यांनी केली आहेत.
दिग्दर्शक निखिल महाजन या चित्रपटाबद्दल म्हणाले, “‘रावसाहेब’च्या निमित्ताने आम्ही रहस्यमय कथानकाच्या शैलीची परिभाषा बदलण्याचा प्रयत्न केला आहे. ही अशी कथा आहे जी प्रेक्षकांना भयभीत करण्यासोबतच खिळवूनही ठेवेल. प्रत्येक फ्रेममध्ये परिपूर्णतेचा प्रयत्न हा ‘रावसाहेब’ला खऱ्या अर्थाने वेगळे करतो. ग्राउंडब्रेकिंग व्हिज्युअल तयार करण्यासाठी आम्ही महत्त्वपूर्ण प्रयत्न केले आहेत. आमच्या या रोमांचक प्रवासात प्रेक्षकही सहभागी होतील यात शंका नाही.”
हे देखील वाचा – Video : महाराष्ट्र शासनाकडून रौप्य पदक देत निवेदिता सराफ यांचा सन्मान, म्हणाल्या, “हा सन्मान माझा नसून…”
तर निर्माते अक्षय बर्दापूरकर यावेळी म्हणाले, “या चित्रपटाच्या निमित्ताने मला पुन्हा एकदा निखिल महाजन यांच्यासह काम करण्याची संधी मिळाली. निखिलबरोबर काम करताना मी नेहमीच उत्सुक असतो. एकतर आम्ही खूप चांगले मित्र आहोत आणि आम्ही दोघेही औरंगाबादचे आहोत. त्यात निखिलचे विषय हे नेहमीच चौकटीबाहेरचे असतात. त्या चित्रपटांमध्ये भावना असतात. हा सुद्धा एक वेगळा आणि संवेदनशील विषय आहे. चित्रपटाची संपूर्ण टीम कमाल असून लवकरच हा चित्रपट प्रेक्षकांच्या भेटीला येईल.”
