Navri Mile Hitlerla fame Actress news : रस्त्यावरुन जात असताना मुलींची छेडछाड होण्याच्या अनेक घटना घडतात. मुलींना पाहून मोठ मोठ्याने गाणी म्हणणे, विचित्र हावभाव करणे किंवा इतर अनेक गोष्टी सर्रासपणे दिवसाढवळ्या होताना दिसतात. याबाबत अनेकजण आवाज उठवतात तर काही महिला लाजेने या गोष्टींवर भाष्य करत नाहीत वा दुर्लक्ष करतात. तर अशीच एक घटना ‘नवरी मिळे हिटलरला’ या मालिकेतील अभिनेत्री आलापिनीबरोबर घडल्याचे समोर आले आहे. बऱ्याचदा या घटना समोर येत नाहीत, पण काही मुली न घाबरता अशा घटनांबद्दल जाहिरपणे बोलताना दिसतात.
अभिनेत्री आलापिनी निसळने सोशल मीडियावर एक इन्स्टाग्राम स्टोरी शेअर करत तिच्याबरोबर घडलेला प्रकार सांगितला आहे. तिने इन्स्टाग्राम स्टोरी शेअर करत लिहिले, “३ दुचाकी, ६ मुले, रस्त्याच्या मधोमध गाडी चालवत होते आणि ते एकमेकांशी बोलत होते, मी त्यांना ओव्हरटेक केला. ती मुले गाड्यांचे हॉर्न वाजवत होते. ‘बघ की इकडे, ए पाव्हणी’, असे ते मोठमोठ्याने म्हणत होते आणि शिट्ट्या वाजवत होते. मी वळले तेव्हा ते अशा पद्धतीने पुढे गेले की जणू काही घडलेच नाही”.
आणखी वाचा – उमेश कामतचा नव्या घरातील पहिला गणेशोत्सव, प्रिया मोदक करताना दिसली स्वयंपाकघराची झलक, हॉलही आहे प्रशस्त
अभिनेत्रीने पुढे लिहिले, “मी घरी आले, बाप्पाच्या शेजारी बसले मला माहीत नाही मी तिथे किती वेळ बसले होते”. असे लिहित आलापिनीने घडलेली घटना सांगितली. आलापिनी निसळ ही लोकप्रिय अभिनेत्री आहे. ‘नवरी मिळे हिटलरला’ या मालिकेतून अभिनेत्री घराघरात पोहोचली. तिने या मालिकेत रेवतीची भूमिका साकारली होती. मालिका संपल्यानंतरही अभिनेत्री आलापिनी व्हिडीओच्या माध्यमातून प्रेक्षकांच्या भेटीला येत असते. तिच्या नृत्य सादरीकरणाच्या व्हिडीओला प्रेक्षकांची चांगलीच पसंती मिळते.
आलापिनीचे वल्लरी विराजबरोबरचे डान्स व्हिडीओ सोशल मीडियावर व्हायरल होताना ही दिसतात. आलापिनीबरोबर भर गणेशेत्सवात घडलेली ही विचित्र घटना अर्थातच लाजिरवाणी आहे. असे वाईट वागणाऱ्यांना योग्य ती शिक्षा नक्कीच मिळायला हवी. तेव्हाच एखादी मुलगी बिनधास्त घराबाहेर पडू शकते.
