उद्योगपती मुकेश अंबानी यांचा धाकटा मुलगा अनंत अंबानी याच्या लग्नाची तारीख आता जवळ आली आहे. येत्या १२ जुलै रोजी अनंत व राधिका याचा शाही विवाहसोहळा संपन्न होणार आहे. दोघांच्या लग्नापुर्वीच्या विधींनाही सुरुवात झाली असून हळद, संगीत सोहळा अगदी थाटामाटात पार पडलेला पाहायला मिळाला. अनंत-राधिकाच्या लग्नसोहळ्यातील कार्यक्रमात अनेक सेलिब्रेटीही हजेरी लावत आहेत. तसेच जवळचे नातेवाईक व कुटुंबियांच्या उपस्थितीत हे सोहळे पार पडले. (Mukesh Ambani Invited To Shreyas Raje)
मुकेश अंबानी यांच्या सगळ्यात धाकट्या मुलाचं आणि त्यांच्या मुलांपैकी शेवटचं लग्न असल्याने हे लग्न सगळेचजण एन्जॉय करत आहेत. त्यांच्या कुटुंबात वेगळाच उत्साह पाहायला मिळत आहे. प्रत्येकजण या सोहळ्यासाठी उत्सुक असल्याचं पाहायला मिळत आहे. अंबानी कुटुंबाकडून सिनेसृष्टीतील कलाकार मंडळींना तसेच दिग्गज व्यक्तींनाही लग्नासाठी आमंत्रित कऱण्यात आले आहे. अशातच अनंत अंबानीच्या लग्नाचे आमंत्रण एका मराठमोळ्या अभिनेत्यालाही मिळाले आहे.
या मराठमोळ्या अभिनेत्याने इन्स्टाग्राम अकाउंटवरुन स्टोरी पोस्ट शेअर करत याबाबतची माहिती शेअर केली आहे. हा मराठमोळा अभिनेता म्हणजे श्रेयस राजे. श्रेयसने आजवर अनेक मराठी मालिका, चित्रपट यांमधून महत्त्वपूर्ण भूमिका साकारत प्रेक्षकांची मन जिंकली आहेत. अशातच श्रेयसने त्याच्या इन्स्टाग्राम अकाउंटवरुन शेअर केलेल्या अंबानी यांच्या लग्नाच्या निमंत्रण पत्रिकेने साऱ्यांचं लक्ष वेधलं आहे. निमंत्रण पत्रिकेचा फोटो शेअर करत त्याने, “आता जावं लागेल लग्नाला”, असं म्हटलं आहे.
सध्या श्रेयस रंगभूमी गाजवत आहे. चारचौघी या नाटकातून तो महत्त्वपूर्ण भूमिका साकारताना दिसत आहे. श्रेयसने मुकेश अंबानी यांच्या मुलाची लग्नपत्रिका शेअर करत ही पत्रिका त्याच्यापर्यंत कशी पोहोचली हे देखील सांगितलं आहे. यावेळी त्याने लिहिलं की, “तर ही दस्तुरखुद्द मुकेश अंबानी यांच्या मुलाच्या लग्नाची पत्रिका आहे. ही पत्रिका माझ्यापर्यंत पोहोचावी म्हणून अंबानी मॅनेजमेंटकडून एक माणूस अँपॉईंट केला होता. जो वांद्रे येथून घोडबंदरपर्यंत फक्त पत्रिका द्यायला आला होता. कौतुकास्पद व्यवस्थापन आहे”.
