‘सारेगमप लिटिल चॅम्प्स’ या शोमधून आपल्या गोड आवाजाने श्रोत्यांना मंत्रमुग्ध करणारी लोकप्रिय जोडी म्हणजे मुग्धा वैशंपायन व प्रथमेश लघाटे. गेल्या काही दिवसांपासून ते त्यांच्या खासगी आयुष्यामुळे चर्चेत आहेत. मुग्धा व प्रथमेश हे दोघेही सोशल मीडियावर चांगलेच सक्रिय असतात. सोशल मीडियावर ते त्यांचे फोटो व गाण्याचे व्हिडीओ शेअर करत चाहत्यांच्या संपर्कात राहत असतात.
मुग्धा व प्रथमेश त्यांच्या लग्न सोहळ्यामुळे विशेष चर्चेत आलेले पाहायला मिळाले. लग्नानंतर ही जोडी अनेक प्रेक्षकांच्या मनात घर करुन राहिली. दोघांच्या लग्नाची जोरदार चर्चाही रंगलेली पाहायला मिळाली. आपल्या गाण्याने चर्चेत राहणारी ही जोडी सोशल मीडियावरही तितकीच चर्चेत राहत असते. अशातच त्यांनी सोशल मीडियावर आणखी एक व्हिडीओ शेअर केला आहे.
२१ डिसेंबर रोजी मुग्धा-प्रथमेश ही जोडी विवाहबंधनात अडकली. अशातच नुकतेच त्यांच्या लग्नाला सहा महिने पूर्ण झाले असून या सहा महिन्यांच्या पूर्ततेनिमित्त मुग्धाने खास व्हिडीओ शेअर केला आहे. या व्हिडीओमध्ये तिने असं म्हटलं आहे की, “आरवलीत श्री आदित्यनारायणाचं देऊळ आहे. गेली सुमारे १४७ वर्ष आदित्यनारायणाचा उत्सव सुरू आहे. उत्सवाचं माझं हे पहिलंच वर्ष”.
यापुढे तिने “जागतिक संगीत दिनाच्या निमित्ताने हा व्हिडिओ शेअर करत आहे” असं म्हणत “तुम्हा सर्वांना जागतिक योग आणि संगीत दिनाच्या निरोगी आणि सुरेल शुभेच्छा” असं म्हटलं. तसेच यापुढे तिने “आम्हाला ६ महिन्यांच्या शुभेच्छा” असंही म्हटलं आहे.
दरम्यान, मुग्धाने शेअर केलेल्या या व्हिडीओला चाहत्यांनी लाईक्स व कमेंट्स करत चांगलाच प्रतिसाद दिला आहे. या व्हिडीओखाली तिच्या अनेक चाहत्यांनी “किती गोड, क्या बात है, खूपच सुंदर, खरंच अत्यंत सुरेख गायन मुग्धा, छान परंपरा जपत आहात, सुंदर” अशा अनेक कमेंट्स करत या प्रतिसाद दिला आहे.
