अनेकदा पडद्यावर घडणाऱ्या गोष्टींपेक्षा पडद्यामागच्या काही रंजक गोष्टी जाणून घेण्यासाठी अनेक प्रेक्षक किंवा चाहते उत्सुक असतात. पडद्यावर चित्रित होणाऱ्या एखाद्या दृश्यासाठी पडद्यामागील मंडळी तंत्रज्ञ किंवा कलाकार कशी मेहनत घेतात?, यात ते कशी तयारी करतात याबद्दल अनेकांना जाणून घेण्यात रस असतो. अशातच सध्या युट्युबवर ‘इट्स मज्जा’ व ‘कोरी पाटी’ प्रॉडक्शन यांची ‘आठवी-अ’ ही सीरिज धुमाकूळ घालत आहे.
या सिरीजच्या प्रत्येक भागाला प्रेक्षकांचा तुफान प्रतिसाद मिळताना पाहायला मिळत आहे. त्यामुळे या सीरिजच्या प्रदर्शित होणाऱ्या भागांच्या पडद्यामागे घडणाऱ्या अनेक रंजक कथा जाणून घेण्यासाठी या सीरिजचे चाहते मंडळी खूपच उत्सुक असतात. अशातच या सीरिजच्या नुकत्याच झालेल्या एका भागात विहिरीत पोहणाऱ्या मधुकर, किरण्या यांचा धम्माल परफॉर्मन्स पाहायला मिळाला आणि हा सीन शूट कसा झाला? याबद्दलचा एक BTS व्हिडीओ शेअर करण्यात आला आहे.
‘इट्स मज्जा’च्या युट्यूब चॅनेलद्वारे हा BTS व्हिडीओ शेअर करण्यात आला असून यामध्ये कलाकारांसह तंत्रज्ञ मंडळींची मेहनत दिसून येत आहे. या BTS व्हिडीओमध्ये कलाकारांच्या पोहण्यासह त्यांचे संवाद वाचन, तसेच सीनचे सादरीकरण, त्याचा सरावही पाहायला मिळत आहे. सीरिजचे दिग्दर्शक नितीन पवार हे या सीरिजमधील कलाकरांना सीन समजावून सांगताना, तसेच त्या सीनसाठीचा सराव करून घेतानाचे काही दृश्यदेखील या BTS व्हिडीओमध्ये पाहायला मिळत आहे. तसेच दोन सीनमधल्या रिकाम्या वेळात सहकलाकारांबरोबरची धमाल मजामस्तीही या व्हिडीओमध्ये पाहायला मिळत आहे.
आणखी वाचा – ‘बिग बॉस मराठी’च्या पाचव्या सीझनची घोषणा, कोणत्या स्पर्धकांची शोमध्ये होणार एंट्री?, प्रोमोने वेधलं लक्ष
‘आठवी-अ’ या सीरिजचे शूटिंग हे सातारामध्ये सुरू आहे आणि या मालिकेतील सगळेच कलाकार हे सातारामधील आहेत. त्यामुळे मातीशी नाळ जोडणाऱ्या कलाकारांचा सकस अभिनय व कथा अनेक प्रेक्षकांच्या मनाचा ठाव घेत आहे. त्यामुळे साहजिकच या सीरिजला प्रेक्षकांकडूनही तुफान प्रतिसाद मिळत असून या सीरिजच्या प्रत्येक भागाला लाखोंच्या पार व्ह्यूज मिळत आहेत. दरम्यान, ‘आठवी-अ’ या सीरिजद्वारे डोंगरावरच्या एका छोट्याश्या खेडेगावातून हायस्कुलसाठी परगावी येणाऱ्या अभिजीत व त्यांच्या खास मित्रांची साधी तरी प्रत्येकाला आपलीशी वाटणारी गोष्ट सांगण्यात आली आहे.
